Tadbir davomida BMTning Atrof-muhit bo‘yicha dasturi (UNEP) dastur menejeri Chjenchjen Syuy “Nature-Based Solutions Innovation Accelerator” (NBS-IA) tashabbusini taqdim etdi. Ushbu tashabbus Italiya Atrof-muhit va energetik xavfsizlik vazirligi rahbarligida UNEP hamda Iqtisodiy hamkorlik va taraqqiyot tashkiloti (OECD) bilan hamkorlikda amalga oshirilmoqda.

Ta’kidlanishicha, tashabbus rivojlanayotgan mamlakatlar va shakllanayotgan iqtisodiyotga ega davlatlarda muhim infratuzilmaning barqarorligini oshirishga qaratilgan innovatsion tabiatga asoslangan yechimlarni (Nature-based Solutions — NbS) ishlab chiqish va joriy etishni qo‘llab-quvvatlaydi. 

Tadbirda Markaziy Osiyo mamlakatlari duch kelayotgan iqlimiy muammolarga alohida e’tibor qaratildi. Jumladan, qurg‘oqchilik, suv toshqinlari, muzliklarning erishi va cho‘llanish kabi jarayonlar mintaqaning transport, suv xo‘jaligi va energetika infratuzilmasiga bevosita ta’sir ko‘rsatmoqda.

Ishtirokchilar o‘rmonlar, suv-botqoq hududlari, yaylovlar va boshqa tabiiy hududlarning ekotizim funksiyalaridan foydalanishga asoslangan tabiatga yo‘naltirilgan yechimlarning salohiyatini muhokama qildilar. Bunday yondashuvlar iqlimiy xavflarni kamaytirish, infratuzilmaning barqarorligini oshirish va biologik xilma-xillikni saqlashga xizmat qiladi.

Muhokamalar davomida NBS-IA tashabbusi bilan mintaqada amalga oshirilayotgan dastur va strategiyalar o‘rtasidagi hamkorlik imkoniyatlari, shuningdek, tabiatga asoslangan yechimlar sohasiga investitsiyalarni jalb qilish va hamkorlikni kengaytirish istiqbollari ko‘rib chiqildi. Shuningdek, pilot loyihalarni tayyorlash, tashabbuslarni saralash mezonlari, arizalarni topshirish mexanizmlari hamda muvaffaqiyatli ekologik amaliyotlarni keng miqyosda joriy etish uchun mintaqaviy hamkorlikni rivojlantirish masalalariga alohida e’tibor qaratildi.

Mazkur sayd-tadbir barqaror infratuzilma va iqlim o‘zgarishlariga moslashish sohasida davlat idoralari, xalqaro moliyaviy institutlar, ilmiy hamjamiyat hamda fuqarolik jamiyati o‘rtasidagi muloqotni mustahkamlash uchun muhim platforma bo‘lib xizmat qildi.