Sessiya ekologik investitsiyalarni jalb etishning zamonaviy yondashuvlari, innovatsion yechimlarni joriy etish hamda iqlim o‘zgarishi bilan bog‘liq tahdidlar va ekologik xavflar kuchayib borayotgan sharoitda Markaziy Osiyo mamlakatlarida barqaror rivojlanishni ilgari surish masalalarini muhokama qilish maydoniga aylandi.

Tadbirda O‘zbekiston Respublikasi Prezidentining ekologiya masalalari bo‘yicha maslahatchisi — Ekologiya va iqlim o‘zgarishi milliy qo‘mitasi raisi Aziz Abduhakimov tabrik so‘zi bilan chiqish qilib, mintaqaning ekologik xavfsizligi va barqaror iqtisodiy o‘sishini ta’minlash uchun xalqaro hamkorlikni rivojlantirish, yashil texnologiyalarni joriy etish va barqaror moliyalashtirish mexanizmlarini kengaytirish muhimligini ta’kidladi.

“O‘zbekiston uchun "yashil" transformatsiya endi faqat xalqaro iqlim kun tartibining bir qismi emas, balki davlat taraqqiyot strategiyasining muhim elementi hisoblanadi. Bugungi kunda mamlakat iqlim majburiyatlarini shakllantirish bosqichidan ularni amaliyotga tatbiq etish bosqichiga izchil o‘tmoqda. Biz investitsiyalar, innovatsiyalar va texnologiyalar integratsiyasi iqlim bilan bog‘liq tahdidlarni barqaror iqtisodiy o‘sish uchun yangi imkoniyatlarga aylantirishiga ishonamiz”, — dedi A. Abduhakimov.

Yalpi muhokamada Qozog‘iston Respublikasi ekologiya va tabiiy resurslar vaziri Yerlan Nisanbayev, Tojikiston Respublikasi Hukumati huzuridagi Atrof-muhitni muhofaza qilish qo‘mitasi raisi Bahodur Sheralizoda, Serbiya Respublikasi atrof-muhitni muhofaza qilish vaziri Sara Pavkov hamda "Vision Invest" kompaniyasi prezidenti va bosh ijrochi direktori Omar Al-Midani ishtirok etdi.

Sessiya davomida "yashil" investitsiyalar va barqaror moliyalashtirishni rivojlantirish, biznes va sanoatda ESG tamoyillarini joriy etish, qayta tiklanuvchi energetika va ekologik toza transportni rivojlantirish, shuningdek, iqlim innovatsiyalari sohasida xalqaro hamkorlikni kengaytirish istiqbollari muhokama qilindi.

Shuningdek, aylanma iqtisodiyot (circular economy), "clean-tech" yechimlarini joriy etish, chiqindilarni qayta ishlash, suv tejovchi texnologiyalar va barqaror qishloq xo‘jaligini rivojlantirish masalalariga alohida e’tibor qaratildi.

Ishtirokchilar ekologik loyihalarni amalga oshirish, iqlimga bardoshlilikni kuchaytirish hamda innovatsion yechimlarni Markaziy Osiyo mamlakatlarida keng joriy etish uchun xalqaro moliyaviy resurslarni jalb qilish mexanizmlarini ham ko‘rib chiqdilar.

Muhokamalar davomida "yashil" texnologiyalarni rivojlantirish, ekologik mas’uliyatli biznesni qo‘llab-quvvatlash va mintaqaviy hamkorlikni mustahkamlash barqaror rivojlanish hamda iqlim o‘zgarishi oqibatlariga samarali javob qaytarishning asosiy shartlaridan biri ekani qayd etildi.

Bundan tashqari, degradatsiyaga uchragan landshaftlarni tiklash, cho‘llanishga qarshi kurashish, suv va iqlimga bardoshlilikni oshirish, shuningdek, investitsiyalarni jalb etish va qo‘shma ekologik tashabbuslarni ilgari surish uchun B2B (biznesdan biznesga) va B2G (biznesdan davlatga) platformalarini rivojlantirish masalalari ham muhokama markazida bo‘ldi.

Yuqori darajadagi yalpi sessiya xalqaro muloqotni mustahkamlash, mintaqaning investitsiyaviy salohiyatini namoyish etish hamda yashil iqtisodiyot va barqaror rivojlanish sohalaridagi innovatsion yechimlarni ilgari surish uchun muhim maydon bo‘lib xizmat qildi.