O‘zbekiston Respublikasi Ekologiya va iqlim o‘zgarishi milliy qo‘mitasi

Festival Qoraqalpog‘iston Respublikasi Ekologiya va iqlim o‘zgarishi milliy qo‘mitasi, Qoraqalpog‘istonning qo‘riqlanadigan tabiiy hududlari xodimlari, “Sayg‘oqni saqlash alyansi” xalqaro tashkiloti, “Ekomaktab” NNT volontyorlari hamda O‘zbekiston Respublikasi Fanlar akademiyasi Zoologiya instituti ekspertlari ko‘magida tashkil etildi.

Ma'lumot uchun, joriy yilda ekologik tashabbus o‘zining yubiley sanasini nishonlamoqda — bundan roppa-rosa 20 yil avval “Sayg‘oq kuni” ilk bor Ustyurt maktablarida Zoologiya instituti olimlari tashabbuskor guruhi, “Ekomaktab” NNT hamda “Sayg‘oqlarni muhofaza qilish ittifoqi” xalqaro tashkiloti ko‘magida o‘tkazilgandi. O‘tgan ikki o‘n yil davomida ushbu bayram nafaqat Qoraqalpog‘istonda, balki sayg‘oq yashaydigan boshqa hududlarda — Qozog‘iston, Qalmog'iston va Mo‘g‘ulistonda ham mashhur bo‘lib ketdi.

An’anaga ko‘ra, “Sayg‘oq kuni” doirasida maktablarda ochiq ekologik darslar, tabiatni muhofaza qilish aksiyalari, “Sayg‘oq kubogi” uchun sport musobaqalari — marafonlar, velosiped poygalari, futbol, voleybol va basketbol uchrashuvlari, shuningdek, qiziqarli ekologik kvestlar tashkil etiladi. Har bir aholi punktida yoshlarning tashabbuslari va qiziqishlarini inobatga olgan holda o‘ziga xos tadbirlar dasturi shakllantiriladi.

Tadbirda Nukus, Mo‘ynoq shaharlari hamda Qoraqalpog‘iston Respublikasining Qo‘ng‘irot tumanidagi Jasliq, Qoraqalpog‘iston va Qirqqiz qishloqlaridagi maktab o‘quvchilari ishtirok etdi. Mazkur hududlarda faoliyat yuritayotgan “Sayg‘oq do‘stlari” bolalar va yoshlar ekologik klublari a’zolari ham festivalda qatnashdi. Ushbu klublarning o‘qituvchi va murabbiylari ekologik yetakchilar sifatida bolalar hamda yoshlarni tabiatni muhofaza qilish aksiyalari, mahallalarni obodonlashtirish va mahalliy flora hamda faunani asrash ishlariga ruhlantirib kelmoqda. Amaliy tashabbuslar orqali yosh avlodda ekologik madaniyat va atrof-muhitga mas’uliyatli munosabat shakllanmoqda.

Bu kabi tadbirlar tabiatga ehtiyotkorona munosabatni shakllantirish, aholining ekologik xabardorligini oshirish va yosh avlodda ona yurtga muhabbat tuyg‘usini mustahkamlashga xizmat qiladi.

Mazkur tadbirlar sayg‘oqlar yashash hududlariga yaqin joylashgan aholi punktlari aholisi, bolalar va yoshlar o‘rtasida ekologik targ‘ibot hamda tabiatni muhofaza qilish faoliyatini rivojlantirishga qaratilgan. Sayg‘oq O‘zbekiston Respublikasi Qizil kitobi va Xalqaro tabiatni muhofaza qilish ittifoqining Qizil ro‘yxatiga kiritilgan yo‘qolib borayotgan noyob tur hisoblanadi.