Yosh avlodning ekologik madaniyatini oshirishga qaratilgan spektakl premyera qilindi
2026-05-22 18:30:00 / Yangiliklar
Tadbirda nutq so‘zlagan Ekologiya qo‘mitasi rais maslahatchisi Alisher Salomov davlat rahbari tomonidan ekologik madaniyatni oshirishga alohida e'tibor qaratilayotganligini ta'kidladi. U "Ona zamin" spektakli ham yosh avlodning ekologik ongini yuksaltirish, eko-madaniyati va mas'uliyatini oshirishga hissa qo‘shishini qayd etdi.
“Ona zamin” — bolalarga mo‘ljallangan ekologiya mavzusidagi ilk spektakl. Uning bosh g‘oyasi – inson va tabiat. Ya’ni odamzotning salbiy faoliyati oqibatida tabiat inqirozga yuz tutishini va, aksincha, har bir qilayotgan ishimizda borliqni asrashni o‘ylasak, ertaga shu zaminda o‘zimiz sog‘lom yashashimiz, farzandlarimiz o‘ynab-quvnab ulg‘ayishi mumkinligini singdirishdir", — dedi A. Salomov.
Yozuvchi Madina Mo‘minova asari asosida tayyorlangan spektaklda insoniyat va tabiat o‘rtasidagi munosabat ta'sirchan ifodalangan. Unda tomoshabinlar Ona zamin nomidan tabiatga ehtiyotkor munosabatda bo‘lishga chaqiriladi.
"Hamma narsaning javobi bor. Biz bugun suvni isrof qilsak, daraxtlarni sindirsak, qushlarga ozor bersak, ertaga buning javobi og‘ir bo‘ladi. Yoshlarga bu tushunchani singdirish, tabiat ne'matlaridan tejamkorlik bilan foydalanishni singdirishni maqsad qilganmiz. Agar spektaklni ko‘rgan bolajonlarda tabiatga mehr uyg‘onsa, isrofgarchilikka yo‘l qo‘ymasa, maqsadimizga erishgan bo‘lamiz", — dedi O‘zbekistonda xizmat ko‘rsatgan artist Farida Umarova.
Spektakl raqs, monolog, qo‘shiq va turli sahna epizodlari orqali yosh tomoshabinlarni tabiatni asrash, uning qadriga yetish va ekologik mas’uliyat haqida chuqur mushohada yuritishga chorlaydi. Sahna asarida zamonaviy, vizual yechimlardan keng foydalanilgan. Shuningdek, maxsus effektlar orqali tabiatning ifloslangan va qayta tiklangan holati aks ettirilgan.
Aktyorlar zamonaviy xoreografiya elementlari yordamida sanoat rivoji, chiqindixonalar, daraxtlar kesilishi, suvning ifloslanishi, o‘simlik va hayvonot dunyosi nobud bo‘lishining salbiy oqibatlarini sahna harakatlari orqali namoyon etganlar.