O‘zbekiston Respublikasi Ekologiya va iqlim o‘zgarishi milliy qo‘mitasi

Tadbirda O‘zbekiston Respublikasi Prezidentining ekologiya masalalari bo‘yicha maslahatchisi — Ekologiya qo‘mitasi raisi Aziz Abduhakimov, Birlashgan Arab Amirliklarining O‘zbekistondagi Favqulodda va Muxtor elchisi Said Matar al-Qamziy, Shveysariya elchixonasining mintaqaviy maslahatchisi Denis Pisoni, xorijiy diplomatik korpus vakillari, BMT Oziq-ovqat va qishloq xo‘jaligi tashkiloti (FAO), Global yashil o‘sish instituti, Jahon banki, xalqaro institutlar vakillari, yosh eko-faollar va ommaviy axborot vositalari xodimlari ishtirok etdi.

Ko‘rgazmani ochib bergan Aziz Abduhakimov rassom oddiy takrorlanuvchi harakatlar va sahnalar orqali zamonaviy hayot insonlarga, jamiyatga va atrof-muhitga qanday ta’sir ko‘rsatayotgani haqida chuqurroq o‘ylab ko‘rishga undashini ta'kidladi.

“Qo‘g‘irchoqlar” timsoli insonlar ba’zan bir xil qolipda, kundalik odatlar girdobida yashab, o‘z xatti-harakatlari va tanlovlari jamiyat hamda atrof-muhitga qanday ta’sir qilayotganini sezmay qolishini ifodalaydi, — dedi rais. — Shu bilan birga, ko‘rgazma mas’uliyat va ongli yondashuv haqida muhim g‘oyani ham ilgari suradi. U insonning fikrlashi va xulq-atvoridagi hatto kichik o‘zgarishlar ham jamiyat, atrof-muhit va tabiat bilan uyg‘un munosabatlarda ijobiy o‘zgarishlarga olib kelishi mumkinligini ko‘rsatadi".

Ma'lumot uchun, Peter Ershmann yigirma yildan ortiq vaqt davomida videoinstallyatsiya yo‘nalishida ijod qilib kelmoqda. U raqamli "tableaux vivants" — o‘ziga xos “jonli suratlar”ni yaratadi. Ularda qahramonlar bir xil harakat va odatiy ishlarni qayta-qayta takrorlaydi. Bu doimiy harakatlar zamonaviy hayotning kundalik marosimlarini eslatib, insonga ta’sir qiluvchi tizimlar — texnologiyalar, ijtimoiy me’yorlar, iqtisodiy jarayonlar va ekologik o‘zgarishlarning metaforasiga aylanadi.

Ko‘rgazma sekinlashtirilgan ritm va yashirin ichki ziddiyatlarga ega bo‘lgan bir qator makonlar sifatida namoyon bo‘ladi. Unda qahramonlar go‘yo erkinlik va bo‘ysunish oralig‘ida mavjuddek ko‘rinadi. Qo‘g‘irchoqlar obrazi ekspozitsiyaning asosiy metaforasiga aylanadi — u insonni uning kundalik hayotini bir vaqtning o‘zida shakllantiruvchi va cheklovchi tizimlar ichidagi timsol sifatida aks ettiradi.

Shveysariyalik rassomning ko‘rgazmasi O‘zbekistonda ilk bor tashkil etildi. Mazkur ko‘rgazma tomoshabinni atrof-muhitga zarar keltiradigan bir xil xatolarni takrorlamaslikka, tabiatni asrash borasida mas’uliyatli bo’lishga chaqiradi.

“Bugungi kunda yangi texnologiyalar, dunyoning qanday o‘zgarishi va tabiatga ta’siri haqida ko‘plab savollar mavjud. Rassom sifatida shuni angladimki, asarlarimning o‘zi emas, balki insonlar uchrashib, suhbat quradigan muhit ko‘proq ahamiyatga ega. Biz “Green University” galereyasidamiz. Shu sababli mening istagim — tabiat, suv, o‘rmonlar, o‘simliklar va atrofimizdagi barcha narsalar haqida aynan shu yerda suhbatlashishdir. Chunki tasvirlarim haqiqiy dunyo bilan bog‘liq. Ular kompyuter tomonidan yaratilgan sun’iy obrazlar emas, balki real hayotdan olingan tasvirlardir. Bugungi kunda dunyo o‘zgarib bormoqda va oldimizda juda muhim qarorlar turibdi. Menimcha, “ARTepa” aynan shu mavzularni namoyich etish uchun mukammal maskandir”, — dedi rassom.

Peter Ershmann ko‘rgazma nega aynan “Qo‘g‘irchoqlar” deb nomlanganiga izoh berdi.

“So‘nggi 25 yil davomida yaratgan videolarimni qayta ko‘rib chiqqanimda, aynan shu mavzu vaqti-vaqti bilan takrorlanib kelganini angladim. 25 yildan beri har yili shu g‘oya yana qaytib keladi. Atrofdagi dunyoni kuzatar ekanman va kameradan foydalanganimda, insonlar va tabiat o‘rtasidagi bog‘liqliklarni ko‘raman. Go‘yo ular tashqaridan keladigan qandaydir kuchsiz hech narsa qila olmaydigandek tuyuladi. Qo‘g‘irchoqlar ham aynan mana shu yashirin kuchlarni ifodalaydi. Asosiy mavzu ham shu”.

BAA elchisi Said Matar al-Qamziy ushbu ko‘rgazma O‘zbekiston yoshlari uchun san’atning yangicha turi haqida o‘ylashga ilhom beradigan katta innovatsion turtki ekanligini qayd etdi.

"Peter Ershmanning asarlari san’atning yangicha ko‘rinishi bo‘lib, inson va tabiat uyg‘unligini juda ta’sirchan hamda innovatsion usulda namoyon etadi. Asarlarda elektron texnologiyalar va zamonaviy texnikaning inson hayotiga ta’siri ham chuqur aks ettirilgan", — dedi u.

Astronomiya parkida joylashgan galereyadagi ko’rgazma 31-iyulgacha davom etadi. Kirish bepul.