O‘zbekiston Respublikasi Ekologiya va iqlim o‘zgarishi milliy qo‘mitasi

Sayd-iventda O‘zbekiston Respublikasi Ekologiya va iqlim o‘zgarishi milliy qo‘mitasi huzuridagi Davlat ekologik ekspertizasi markazi bosh direktori G‘ayrat Muhamedov o‘z taqdimoti bilan ishtirok etdi. U o‘z chiqishida O‘zbekistonda amaldagi ekologik tartibga solish tizimi, uning kuchli jihatlari hamda mavjud cheklovlari haqida ma’lumot berdi.

Shuningdek, forumda mamlakatda ekologik boshqaruvni yanada takomillashtirish doirasida eng yaxshi mavjud texnologiyalarni (NDT) joriy etish bo‘yicha yondashuv taqdim etildi.

Ta’kidlanganidek, O‘zbekistonda ekologik normallashtirish, atrof-muhitga ta’sirni baholash va davlat ekologik ekspertizasiga asoslangan tizim shakllangan bo‘lib, u samarali faoliyat yuritmoqda. Biroq zamonaviy ekologik chaqiriqlar sharoitida mazkur tizimni texnologik jihatdan boyitish, ya’ni ifloslanishni cheklash bilan bir qatorda uning oldini olishga qaratilgan yondashuvlarni joriy etish muhim ahamiyat kasb etadi.

Shu munosabat bilan O‘zbekiston tomonidan NDTni joriy etishning bosqichma-bosqich va moslashuvchan, ya’ni gibrid modeli taklif etildi. Ushbu model amaldagi normativ bazani saqlab qolgan holda, sanoatda zamonaviy va ekologik samarali texnologiyalarni joriy etishni nazarda tutadi. NDTni joriy etishning dastlabki bosqichida energetika, sement sanoati, kimyo va kon-metallurgiya tarmoqlari kabi yuqori ekologik yuklamaga ega sohalarga ustuvor ahamiyat qaratiladi.

Sayd-ivent ishtirokchilari O‘zbekistonning mazkur yondashuvini ijobiy baholab, uni mintaqada ekologik tartibga solishni modernizatsiya qilishda amaliy va istiqbolli yo‘nalish sifatida qayd etdilar.

Forum doirasida xalqaro tashkilotlar bilan hamkorlikni yanada rivojlantirish, jumladan, NDTni joriy etish bo‘yicha texnik ko‘mak va tajriba almashinuvini kengaytirish masalalari ham muhokama qilindi.