O‘zbekiston ShHT forumida iqlim o‘zgarishiga qarshi kurashda hamkorlik to‘g‘risidagi bitimni ishlab chiqishni qo‘llab-quvvatlashga chaqirdi
2024-07-10 14:45:00 / Yangiliklar
Tadbirda Xitoy Xalq Respublikasi Xalq siyosiy maslahat kengashining Butunxitoy kengashi raisining o‘rinbosari, Shandun viloyati gubernatori, Sindao meri, Eron vitse-prezidenti, Myanma Bosh vaziri va Ozarbayjon parlamenti spikeri o‘rinbosari, ShHTga aʼzo davlatlar, jumladan, Belarus, Qozogʻiston, Xitoy, Qirgʻiziston, Pokiston, Rossiya, Tojikiston, Oʻzbekiston, Qatar, Nepal, Shri-Lanka, Misr, Kambodja, Maldiv orollari, BAA ekologiya va atrof-muhit vazirlari hamda kuzatuvchilari, shuningdek, diplomatlar va olimlar, yetakchi xalqaro institut va tashkilotlar vakillari qatnashdi.
Forumning ochilishida Xitoy xalq siyosiy maslahat kengashi Butunxitoy qo‘mitasi raisi o‘rinbosari Sh.Yueyue Xitoy Xalq Respublikasi Raisi Si Szinpinning ekologik muhitni muhofaza qilish va yashil rivojlanishni rag‘batlantirish ShHT davlatlarining maqsadi ekanligi ta’kidlangan tabrigini o‘qib eshittirdi.
“Xitoy barcha mamlakatlarning barqaror ijtimoiy-iqtisodiy rivojlanishiga, inson va tabiatning uyg‘un yashashiga ko‘maklashish maqsadida ushbu forum orqali yashil rivojlanish bo‘yicha barcha tomonlar bilan almashinuv va hamkorlikni kuchaytirishga umid qilmoqda. Biz barcha tomonlar bilan “Shanxay ruhi”ni rivojlantirish, hamjihatlik va o‘zaro hamkorlikni mustahkamlash, yashil rivojlanishni rag‘batlantirish, umumiy rivojlanishning yangi davrini birgalikda yaratish va ShHT taqdiri umumiy bo‘lgan yanada yaqinroq hamjamiyatni birgalikda barpo etishga tayyormiz”, — deyiladi Si Szinpinning nutqida.
O‘z navbatida, forumning ochilishida ShHT Bosh kotibi Chjan Min ShHT mamlakatlari o‘rtasida ekologiya va atrof-muhitni muhofaza qilish sohasidagi hamkorlikni chuqurlashtirish muhimligini ta’kidlab, mintaqada “yashil” muhitni yaratish, sog‘lom turmush tarzini targ‘ib qilish va barqaror rivojlanishni ta’minlash bo‘yicha tashkilotning yondashuvlarini tushuntirib berdi. Shuningdek, "ShHT 2024 Ekologiya yili" va boshqa mexanizmlar doirasida erishilgan natijalarga alohida to‘xtalib, barcha tomonlarni o‘zaro manfaatli hamkorlikni yanada mustahkamlash, sog‘lom va barqaror rivojlanishga hissa qo‘shishga chaqirdi.
Aziz Abduhakimov oʻz nutqida ShHTga aʼzo mamlakatlarni Prezident Shavkat Mirziyoyev tomonidan ShHT Davlat rahbarlari kengashida taklif etilgan yashil rivojlanish sohasida umumiy maqsad va vazifalarga erishish boʻyicha aniq chora-tadbirlarni oʻz ichiga olgan Iqlim oʻzgarishiga qarshi kurashda hamkorlik toʻgʻrisidagi bitimni ishlab chiqish tashabbusini qoʻllab-quvvatlashga hamda ekologik barqarorlik va yashil oʻsish sohasida chuqur tadqiqotlar olib borishga yoʻnaltirilgan Toshkentda ShHTning innovatsion iqlim yechimlari markazini tashkil qilishda faol ishtirok etishga chaqirdi.
Tadbir doirasida O‘zbekiston delegatsiyasi asosiy ekologik muammolar va ularni hal etishda ShHT davlatlari tomonidan qilinayotgan ishlarga bag‘ishlangan yuqori darajadagi panel sessiyasida ishtirok etdi. Ishtirokchilarga Forum boshlanishidan oldin vazirlik delegatsiyasining cho‘llanish, tuproqni sho‘rsizlantirish va zararsizlantirishga qarshi kurashish, shuningdek, qum bo‘ronlarining oldini olish bo‘yicha Xitoy tajribasini o‘rganish maqsadida amalga oshirilgan tashrifi haqida ma’lumot berildi.
Sessiyada A.Abduhakimov Shinjon-Uyg‘ur avtonom viloyati tajribasini keng targ‘ib etish va O‘zbekistonda ShHTga a’zo davlatlarning cho‘llanishga qarshi yagona markazini tashkil etish taklifini bildirdi.