O‘zbekiston Respublikasi Ekologiya va iqlim o‘zgarishi milliy qo‘mitasi

Qarorda jismoniy va yuridik shaxslarga "Ekofaol fuqaro" hamda "yashil tadbirkor" maqomlarini berish tartibi belgilab berildi. Unga ko'ra, ekologik tamoyillarni o'zining kundalik hayotiga joriy etishda yuqori ko‘rsatkichlarga erishganlarga "Ekofaol fuqaro" maqomi beriladi va ular uchun davlat xizmatlaridan foydalanishda 10 foiz chegirma va davlat ulushi 50 foizdan yuqori bo‘lgan banklarda iste'mol kreditini olishda chegirma taqdim etiladi.

Shuningdek, quyidagi yo‘nalishlarda belgilangan ko‘rsatkichlarni bajargan tadbirkorlik subyektlariga "yashil tadbirkor" maqomi beriladi:

— ko‘kalamzorlashtirish, jumladan, korxonani "yashil belbog'" bilan o'rash, sug'orish tizimlarini o'rnatish, tomchilatish, yomg'irlatish va konteynerli sug'orish tizimini joriy qilish;

— energiya tejamkorligini ta'minlash, jumladan, energiya tejovchi uskunalar va texnologiyalar joriy etish;

— korxonaning atrof-muhitga ta'sirini kamaytirish, jumladan, ekologik huquqbuzarlik sodir etmaslik, atmosferaga tashlamalarni onlayn monitoring qilish tizimini joriy etish;

— ishlab chiqarishga sirkulyar iqtisodiyotni joriy qilish ("7R" tamoyilini tatbiq etish).

Shuningdek, qarorga ko‘ra, "yashil tadbirkor" maqomini olgan tadbirkorlik subyektlari qo‘llab-quvvatlanadi. Xususan, ularga "Shaffof qurilish" platformasida ustuvorlik beriladi, muayyan muddat davomida ekologik tekshiruvlardan ozod etiladi, xalqaro bozorlarga chiqish uchun qo‘llab-quvvatlanadi hamda tadbirkorlik subyektlarining barqarorlik reytingida qo‘shimcha ball beriladi.

"Ekofaol fuqaro" maqomi har chorakda "ekofaolfuqaro.uz" maxsus platformasida o‘tkaziladigan tanlov asosida har bir hududdan eng yuqori ball to‘plagan 50 nafar ishtirokchiga, "yashil tadbirkor" maqomi esa yilda bir marta "yashiltadbirkor.uz" maxsus platformasida o‘tkaziladigan tanlov asosida eng yuqori ball to‘plagan 10 ta tadbirkorlik subyektiga beriladi.