O‘zbekiston Respublikasi Ekologiya va iqlim o‘zgarishi milliy qo‘mitasi

Ostona shahrida bo‘lib o‘tayotgan Mintaqaviy ekologik sammit doirasida Iqtisodiy hamkorlik tashkiloti (IHT)ning Atrof-muhitni muhofaza qilish bo‘yicha yuqori darajadagi muloqot platformasining birinchi yig‘ilishi o‘tkazildi. Ushbu uchrashuv platformaning mintaqaviy ekologik hamkorlikni rivojlantirishga qaratilgan tizimli va inklyuziv mexanizm sifatida rasman ishga tushirilganini anglatadi.

Muloqotda O‘zbekiston Respublikasi Prezidentining ekologiya masalalari bo‘yicha maslahatchisi — Ekologiya va iqlim o‘zgarishi milliy qo‘mitasi raisi Aziz Abduhakimov, Qozog‘iston Respublikasi ekologiya va tabiiy resurslar vaziri Yerlan Nysanbayev, Qirg‘iz Respublikasi tabiiy resurslar, ekologiya va texnik nazorat vaziri Aqil Toktobayev, Tojikiston Respublikasi Hukumati huzuridagi Atrof-muhitni muhofaza qilish qo‘mitasi raisi Bahodur Sheralizoda, Turkmaniston atrof-muhitni muhofaza qilish vaziri Ovezgeldi Goshjanov, Iqtisodiy hamkorlik tashkiloti (IHT) Bosh kotibi Asad M. Xan, shuningdek, BMTning Oziq-ovqat va qishloq xo‘jaligi tashkiloti, BMTning Atrof-muhit dasturi va BMT Taraqqiyot dasturi vakillari ishtirok etdi.

Aziz Abduhakimov o‘z nutqida muhokamalardan amaliy harakatlarga o‘tish zarurligini ta’kidladi. U Atrof-muhitni muhofaza qilish bo‘yicha yuqori darajadagi muloqot platformasini yaratish tashabbusi O‘zbekiston Prezidenti Shavkat Mirziyoyev tomonidan IHTning 15-sammitida ilgari surilganini qayd etdi. Shuningdek, u atrof-muhit holati va atmosfera havosi sifatini monitoring qilish bo‘yicha mintaqaviy tizim yaratish hamda ekologik xavflar bo‘yicha erta ogohlantirish mexanizmini yo‘lga qo‘yishni taklif etdi.

Uchrashuvda IHT mintaqasi o‘zaro bog‘liq va asosan chegaralararo ekologik muammolar majmuasiga duch kelayotgani ta'kidlandi. Ular qatoriga havoning, tuproq va suv resurslarining ifloslanishi ortib borayotgani, bioxilma-xillikning tez sur’atlarda kamayishi, yerlar degradatsiyasi va cho‘llanish, shuningdek, iqlim o‘zgarishining kuchayib borayotgan ta’siri kiradi. Bu jarayonlar aholi salomatligi, ekotizimlar barqarorligi va mintaqa mamlakatlarining uzoq muddatli ijtimoiy-iqtisodiy rivojlanishiga jiddiy xavf tug‘diradi.

Shu munosabat bilan ishtirokchilar mintaqaviy muloqotni mustahkamlash, hamkorlikni kuchaytirish va qo‘shma choralarni amalga oshirish zarurligini ta’kidladilar. Platforma strategik hamkorlik, tajriba almashish va umummanfaatlarga mos qarorlar ishlab chiqish uchun doimiy maydon bo‘lib xizmat qilishi kutilmoqda.

Bundan tashqari, O‘zbekiston tomoni ishtirokchilarni 3-iyun kuni Samarqand shahrida bo‘lib o‘tadigan Global ekologik fondning VIII Assambleyasi doirasidagi vazirlar uchrashuvida muloqotni davom ettirishga taklif etdi.