O‘zbekiston Respublikasi Ekologiya va iqlim o‘zgarishi milliy qo‘mitasi

Eshituv davomida ishtirokchilarga loyiha haqida ma’lumot berildi. Xususan, poytaxtda tirbandlik muammosining hal etilishi, shahar jamoat transporti uchun qulay va xavfsiz hududga aylanishi, bu esa o’z navbatida atmosferaga chiqariladigan zararli tashlamalarni kamaytirishiga e’tibor qaratildi. Chunki harakatlanayotgan avtomobilga qaraganda tirbandlikda turgan transport vositasi havoga ko’proq zararli tashlama chiqaradi.

Shuningdek, loyiha davomida daraxtlarni ko’chirib o’tqazish zarurati yuzaga kelganida bu jarayon ekologik standartlarga amal qilgan holda amalga oshirilishi qayd etildi. Qolaversa, yashil hududlar yaratish, aholi uchun sayr yo’laklari va boshqa muhim jihatlarga e’tibor qaratiladi.

Eshituv davomida mahalliy jamoatchilik va OAV vakillarining loyihaning atrof-muhitga ta’siri, aholi uchun qanday foydali tomonlari borligi va boshqa muhim tomonlari haqidagi savollariga javob qaytarildi. O’z navbatida mahalliy aholi tomonidan poytaxtda tirbandlik asosiy muammolardan biriligi, loyiha mazkur muammoni hal etishga qaratilgani bilan ahamiyatli ekanligi ta’kidlandi.

Ma’lumot uchun, loyiha doirasida Toshkentda haqiqiy tezyurar avtobuslar (BRT) tarmog’i ishga tushadi. Bunda avtobuslar boshqa transportlardan butunlay ajratilgan yo’lda harakatlanadi va hech qanday tirbandlik yuzaga kelmaydi. Loyihada xalqaro standartlarga to’liq amal qilinadi.

Bundan tashqari, Toshkentda zamonaviy drenaj tizimini o‘rnatish, yo‘l cheti to‘siqlarini yangilash, zamonaviy bekat majmualarini o‘rnatish, yerosti va yerusti yo‘l o‘tkazgichlarini qurish, yo‘l harakati ishtirokchilarining xavfsizligi va qulayligini oshirishga qaratilgan boshqa elementlarni joriy etish ko’zda tutilgan.

Loyiha natijasida Toshkent faqat mashinalarga moslashgan shahardan jamoat transporti ustuvor bo’lgan, aholi uchun qulay ekologik va xavfsiz hududga aylanadi.