O‘zbekiston Respublikasi Ekologiya va iqlim o‘zgarishi milliy qo‘mitasi

Unga ko'ra, "Yashil makon" umummilliy loyihasi doirasida yashil hududlarni ko‘paytirish maqsadida yer uchastkalari xatlovdan o‘tkaziladi. Surxondaryo viloyatining Angor, Jarqo‘rg‘on, Muzrabot, Qiziriq, Termiz tumanlari va Termiz shahrida, Sirdaryo viloyatining Sirdaryo, Mirzaobod, Oqoltin va Xovos tumanlarining chegaradosh hududlarida ihota daraxtzorlari hamda "yashil belbog‘"lar barpo etiladi. 

Shuningdek, suvni tejash va "yashil belbog‘"larni rivojlantirish maqsadida To‘palang daryosi havzasining yuqori qismida sun'iy yomg‘ir yog‘dirish hamda sun'iy muzliklar yaratish bo‘yicha tajriba loyihalari amalga oshiriladi. Iqlim o‘zgarishiga ta'sir etuvchi innovatsion texnologiyalar bo‘yicha maxsus ta'limga ixtisoslashgan gidrometeorolog mutaxassislar tayyorlash tizimi ishlab chiqiladi hamda ularning malakasi oshiriladi. 

Qolaversa, kuchli shamol va chang bo‘ronlarining salbiy ta'sirini kamaytirish, ekin yerlari va yaylovlar degradatsiyasining oldini olish, o‘simlik va hayvonot dunyosini muhofaza qilish, saqlash hamda ularni qayta tiklash bo‘yicha zamonaviy texnologiyalarni joriy etishga qaratilgan fundamental, amaliy va ilmiy tadqiqotlar o‘tkaziladi. 

Mazkur qaror Surxondaryo va Sirdaryo viloyatlarining chegaradosh hududlarini ko‘kalamzorlashtirish hamda iqlim o‘zgarishining atrof-muhit va aholi salomatligiga salbiy ta'sirini kamaytirishga xizmat qiladi.