O‘zbekiston Respublikasi Ekologiya va iqlim o‘zgarishi milliy qo‘mitasi

Ko‘rgazma Markaziy Osiyodagi eng yirik platformalardan biriga aylanadi, unda ekologiya va barqaror rivojlanish sohasida faoliyat yuritayotgan dunyoning yetakchi kompaniyalari, innovatsion startaplar, davlat tuzilmalari va xalqaro tashkilotlar birlashadi. 180 dan ortiq mamlakat vakillarining ishtiroki kutilmoqda, bu esa tajriba almashish, ilg‘or yechimlarni namoyish etish va yangi hamkorliklarni yo‘lga qo‘yish uchun noyob imkoniyatlar yaratadi.

Tadbirning asosiy maqsadi – “yashil” texnologiyalarni ilgari surish, ekologik loyihalarga investitsiyalarni rag‘batlantirish, shuningdek, atrof-muhitni muhofaza qilish va iqlim o‘zgarishiga qarshi kurash sohasida xalqaro hamkorlikni rivojlantirishdan iborat.

Ekspozitsiya keng yo‘nalishlarni qamrab oladi: yashil energetika, barqaror qishloq xo‘jaligi va suvni tejovchi texnologiyalardan tortib ekoturizm, chiqindilarni qayta ishlash, “aqlli” shaharlar va ekologiyada sun’iy intellektdan foydalanishgacha.

Ko‘rgazma doirasida, shuningdek, tematik zonalar, namoyish maydonchalari, startap hududlari va interaktiv installyatsiyalar tashkil etiladi.

Ishtirokchilarning amaliy hamkorligiga alohida e’tibor qaratiladi. Dasturda biznes-sessiyalar, ekspert muhokamalari, B2B, B2G va B2C formatidagi muzokaralar, shuningdek, bitimlar imzolash va investitsiya loyihalarini taqdim etish ko‘zda tutilgan.

O‘zbekiston hududlari uchun alohida maydonlar ajratiladi, ularda ekologik vaziyatni yaxshilash va hududlarni barqaror rivojlantirishga qaratilgan amaldagi va istiqbolli tashabbuslar taqdim etiladi.

Ko‘rgazmada yetakchi xalqaro tashkilotlar ham ishtirok etadi, jumladan, UNEP, UNECE, FAO, GEF, GGGI, IUCN, UNCCD, CSM hamda Ramsar konvensiyasi. Ularning ishtiroki barqaror rivojlanish, iqlim o‘zgarishiga moslashish va tabiiy resurslarni oqilona boshqarish sohasida ilg‘or yechimlarni almashish va ilgari surishga xizmat qiladi.

Ko‘rgazmaning GEF Assambleyasi bilan parallel o‘tkazilishi global kun tartibi va mintaqaviy tashabbuslar o‘rtasidagi samaradorlikni kuchaytiradi, shuningdek, O‘zbekistonda amalga oshirilayotgan ekologik islohotlar va loyihalarga xalqaro hamjamiyat e’tiborini jalb etadi.

Ko‘rgazmada ishtirok etish va ko‘rgazma stendini bron qilish uchun rasmiy sayt orqali ro‘yxatdan o‘tish zarur: https://ecoexpo.uz/