O‘zbekiston Respublikasi Ekologiya va iqlim o‘zgarishi milliy qo‘mitasi

Oromgohning ikkinchi kunida “Ipak yo’li“ xalqaro turizm va madaniy meros universitetida yoshlarning iqlimni boshqarish jarayonida ishtirok etishi va dunyodagi iqlim harakati” sessiyasi boʻlib oʻtdi. Unda ishtirokchilar taqdimotlar oʻtkazdilar va global xalqaro konvensiyalarda ishtirok etish boʻyicha oʻz tajribalari bilan oʻrtoqlashdilar.

“Xalqaro yoshlar ekologik oromgohi ikkinchi bor tashkil etilmoqda. Buning ahamiyati shundaki, ekologik oromgoh, nafaqat Osiyo mintaqasi, balki butun dunyo yoshlarini atrof-muhitni asrash yo’lida birlashtiradi. Bu galgi oromgohda ham xorijiy davlatlardan kelgan yoshlar dolzarb ekologik mavzularga e’tibor qaratishmoqda, o’z yechim va takliflarini bildirishmoqda. Albatta, tabiatni muhofaza qilishda yoshlarning ovozi, o’rni muhim ahamiyatga ega. Ekologik oromgoh esa bu ovozni yanada balandroq yangrashiga xizmat qiladi”, - dedi Ekologiya vazirligi bo’lim boshlig’i Anvar Temirov.

Shuningdek, yoshlar muhim masalalarni qamrab olgan ekologik loyihalar haqida soʻz yuritdilar.

“Qirgʻiziston yoshlari ishtirokidagi asosiy loyihalardan biri bu “Jashil Uras” milliy loyihasidir. Mamlakatning barcha viloyatlaridan 5 mingdan ortiq yoshlar birlashib, o‘rmonlar maydonini ko‘paytirish maqsadida ko‘chat o‘tqazishmoqda”, — dedi qirg‘izistonlik ekologik faol Omar Dairov.

Ishtirokchilar, shuningdek, guruhlarga boʻlingan holda “Diplomatiya” interaktiv oʻyinida ishtirok etishdi. O'yinning maqsadi - BMTning iqlim o'zgarishi bo'yicha muzokaralariga taqlid qilishdir, bunda har bir guruh ma'lum bir mamlakatni va uning iqlim o'zgarishi muammosiga munosabatini ifodaladi.

Ta’kidlash joizki, ekologik savodxon yoshlar kelajak avlodlar uchun tabiiy resurslar va biologik xilma-xillikni asrab-avaylashning kalitidir. Yoshlarning ekologik tarbiyasi jamiyatning barqaror rivojlanishiga o‘tishning asosiy omili bo‘lib, bu mamlakat va butun sayyoramizning ekologik xavfsizligi uchun eng muhim sarmoya hisoblanadi.

Ma'lumot uchun, Xalqaro yoshlar ekologik oromgohi tadbirlari 30-iyunga qadar davom etadi.