O‘zbekiston Respublikasi Ekologiya va iqlim o‘zgarishi milliy qo‘mitasi

Assambleya markazida global ekologik maqsadlarga erishishni jadallashtirish bo‘yicha yechimlar ishlab chiqish masalasi turadi. Boy dastur doirasida iqlim o‘zgarishi va uning oqibatlariga bardoshlilikni oshirish, bioxilma-xillikni saqlash, yer degradatsiyasi va cho‘llanishga qarshi kurash, suv resurslarini boshqarish hamda atrof-muhit ifloslanishini kamaytirish kabi masalalar muhokama qilinadi. Shuningdek, 2026–2030-yillarga mo‘ljallangan GEFning yangi moliyaviy dasturiga (GEF-9) alohida e’tibor qaratilib, u tabiat, iqlim va ifloslanishga qarshi kurash masalalarini birlashtiruvchi kompleks yondashuvga asoslanadi.

Assambleya dasturi turli formatdagi tadbirlarni o‘z ichiga oladi, bu esa ishtirokchilarga fikr almashish bilan birga amaliy yechimlar ishlab chiqish imkonini beradi. Yuqori darajadagi plenar yig‘ilishlar o‘tkazilib, ularda asosiy qarorlar qabul qilinadi. Shuningdek, vazirlar darajasidagi va mavzuli davra suhbatlari, fuqarolik jamiyati forumlari, parallel tadbirlar hamda loyihalar taqdimotlari bo‘lib o‘tishi kutilmoqda. Bundan tashqari, Assambleya doirasida GEF Kengashi yig‘ilishlari o‘tkazilib, loyihalar va moliyaviy tashabbuslar ko‘rib chiqiladi.

Assambleya nafaqat muloqot maydoni, balki muhim qarorlar qabul qilish mexanizmi ham hisoblanadi. Tadbir davomida davlatlar GEF faoliyatining strategik yo‘nalishlarini tasdiqlaydi, moliyaviy resurslarni taqsimlash bo‘yicha qarorlar qabul qiladi, ekologik loyihalarni taqdim etadi va ilgari suradi, shuningdek, yangi xalqaro hamkorliklarni shakllantiradi. O‘zbekiston va, umuman, Markaziy Osiyo mintaqasi uchun Assambleyani o‘tkazish investitsiyalarni jalb qilish, hamkorlikni mustahkamlash va ekologik kun tartibini global darajada ilgari surish uchun qo‘shimcha imkoniyatlar yaratadi.

An’anaviy ravishda Assambleyada hukumat delegatsiyalari, xalqaro tashkilotlar, donorlar va moliyaviy institutlar, xususiy sektor vakillari, ekologik faollar hamda nodavlat tashkilotlar ishtirok etadi. Bu esa uni ekologik siyosatni muvofiqlashtirish va resurslarni safarbar etish bo‘yicha eng muhim global maydonlardan biriga aylantiradi.

Samarqandda o‘tkaziladigan GEFning 8-Assambleyasi yaqin yillar uchun global ekologik kun tartibini shakllantirishda muhim bosqich bo‘lib, iqlim, bioxilma-xillik va barqaror rivojlanish masalalarida xalqaro hamkorlikni kuchaytirishga xizmat qiladi.

Tadbirda ishtirok etish uchun ro‘yxatdan o‘tish havolasi:
https://assembly.thegef.org/event/2026/register

Ro‘yxatdan o‘tish 30-aprelgacha ochiq.