Oʻzbekiston CMS COP15'da Markaziy Osiyo sutemizuvchilarini asrashga qaratilgan tashabbusni taqdim etdi
2026-03-26 19:00:00 / Yangiliklar
Tadbirning asosiy maqsadi Markaziy Osiyoda koʻchib yuruvchi sutemizuvchilarni asrash boʻyicha mintaqaviy hamkorlikni rivojlantirish, Markaziy Osiyo sutemizuvchilari tashabbusi (CAMI)ni amalga oshirish masalalarini muhokama qilish hamda turlar va ularning yashash muhitini asrash boʻyicha yangi yondashuvlarni taqdim etishdan iborat boʻldi. Unda mamlakatning mintaqaviy ekologik kun tartibi ilgari surildi va CMS doirasida transchegaraviy hamkorlikni rivojlantirishdagi yetakchi roli namoyish etildi.
CMS ijrochi kotibi Emi Frenkel va Yovvoyi tabiatni muhofaza qilish jamiyati vitse-prezidenti Syuzan Liberman CAMI bioxilma-xillikni saqlash borasidagi sa’y-harakatlarni muvofiqlashtiruvchi muhim mintaqaviy mexanizm ekanini ta’kidladilar.
Oʻzbekiston nomidan asosiy ma’ruzachi sifatida Zarafshon milliy tabiat bogʻi ilmiy ishlar boʻyicha direktor oʻrinbosari Natalya Marmazinskaya chiqish qildi. U oʻz nutqida 2026–2032-yillarga moʻljallangan CAMI ish dasturini taqdim etdi. Dastur hududiy yondashuvga asoslangan boʻlib, ustuvor transchegaraviy tabiatni muhofaza qilish hududlarini belgilashni nazarda tutadi.
Tadbirda Oʻzbekistonning amaliy natijalariga alohida e’tibor qaratildi. Xususan, Buxoro bugʻusining populyatsiyasi tiklangani qayd etildi: uning soni 2015-yildagi taxminan 2780 boshdan 2025-yilga kelib 5000 boshdan oshgan. Bu esa muhofaza qilish, monitoring va populyatsiyani boshqarish boʻyicha izchil choralar samarasidir.
Shuningdek, Oʻzbekiston va Tojikiston tomonidan yoʻl-yoʻl sirtlonni CMSning I va II ilovalariga kiritish boʻyicha qoʻshma tashabbus taqdim etildi. NABU vakili Joshua Shlyuter ushbu turning soni 10 ming boshdan kam ekanini ta’kidlab, uni saqlab qolish uchun xalqaro hamkorlik zarurligini asoslab berdi.
Panel muhokamasi doirasida xalqaro ekspertlar yaylovlardan barqaror foydalanish masalalari va uning saygʻoq kabi koʻchib yuruvchi turlarni saqlashga ta’sirini muhokama qildilar. Shuningdek, bioxilma-xillikni saqlash sohasida global siyosatni kuchaytirish zarurligi qayd etildi.
Tadbir yakunida ishtirokchilar Oʻzbekistonning 2032-yilgacha CAMIga raislik qilishi mintaqaviy kun tartibini shakllantirish, transchegaraviy hamkorlikni mustahkamlash va tabiatni muhofaza qilish tashabbuslarini milliy hamda xalqaro strategiyalarga integratsiya qilishda muhim rol oʻynashini ta’kidladilar.
Mazkur tadbir Oʻzbekistonning global ekologik jarayonlardagi faol ishtirokini yana bir bor namoyish etib, uning Markaziy Osiyoda bioxilma-xillikni muhofaza qilish sohasidagi yetakchi davlatlardan biri ekanini tasdiqladi.