Yaqinlashib kelayotgan tadbir mintaqa uchun dolzarb iqlim va atrof-muhit masalalari boʻyicha muvofiqlashtirilgan muloqotni rivojlantirish uchun asosiy platforma boʻladi. Sammitning tematik dasturi iqlim oʻzgarishi va iqlim oʻzgarishiga moslashishni qoʻllab-quvvatlashdan tortib, tabiiy xavflarga nisbatan iqtisodiy barqarorlikni taʼminlash, oziq-ovqat xavfsizligi va mintaqa ekotizimlarini saqlashgacha boʻlgan keng koʻlamli mavzularni qamrab oladi.
 
Asosiy e'tibor tabiiy resurslardan barqaror foydalanish, atmosfera havosi ifloslanishiga qarshi kurash, chiqindilarni samarali boshqarish hamda adolatli va inklyuziv “yashil” o‘tishni rivojlantirish masalalariga qaratiladi. Kun tartibida ekologik maqsadlarga erishish mexanizmlari hamda barqaror kelajak asosi sifatida ekologik va raqamli kompetensiyalarni rivojlantirish ham mavjud.

Sammitda Markaziy Osiyo davlatlari rahbarlari, davlat organlari, xalqaro tashkilotlar, rivojlanish institutlari, ilmiy doiralar, biznes va fuqarolik jamiyati vakillari ishtirok etishi kutilmoqda. Delegatlarning umumiy soni taxminan 1500 nafarni tashkil etadi.

"RES 2026 EXPO" xalqaro ko‘rgazmasi tadbirning muhim qismi hisoblanadi. Bu barqaror rivojlanish sohasida amaliy texnologik va investitsion yechimlarni namoyish etishga mo‘ljallangan maxsus platforma hisoblanadi. Ko‘rgazma hukumatlar, xalqaro tashkilotlar, global kompaniyalar, moliya institutlari va investorlarni birlashtirib, bevosita muloqot, hamkorlikni rivojlantirish va qo‘shma “yashil” tashabbuslarni yo‘lga qo‘yish imkonini yaratadi. Ko‘rgazmada 30 dan ortiq mamlakat, 300 dan ziyod kompaniya va 20 000 dan ortiq professional tashrif buyuruvchilar ishtirok etishi kutilmoqda.

Ekspozitsiya quyidagi asosiy yo‘nalishlarni qamrab oladi: yangi energetika, suv resurslari, raqamli yechimlar va “aqlli shaharlar”, chiqindilarni boshqarish, ekologik texnologiyalar, ESG va yashil moliyalashtirish, barqaror qishloq xo‘jaligi hamda “yashil” qurilish.

Ko‘rgazmaning uch kunlik ishbilarmonlik dasturi yuqori darajadagi yalpi sessiyalar, tematik panellar, workshoplar va maxsus tadbirlarni o‘z ichiga oladi. Asosiy mavzular qatorida qayta tiklanuvchi energetika rivoji, suv texnologiyalari, resurslarni boshqarishda raqamli transformatsiya, ESG hisobotlari va uglerod hisobi, shuningdek, qurilish va sanoatda ekologik standartlarni joriy etish masalalari bor.

Shuningdek, ekologik startaplar taqdimoti, innovatsion yechimlar namoyishi, eko-texnologiya kunlari va professional muhokamalar kabi amaliy hamkorlik formatlariga alohida e’tibor qaratiladi. Madaniy va ijtimoiy dastur doirasida art-ko‘rgazmalar, ko‘kalamzorlashtirish aksiyalari, ekologik filmlar namoyishi hamda "Green Invest Forum" va startaplar tanlovi kabi maxsus forumlar rejalashtirilgan.

"RES 2026 EXPO"ning asosiy maqsadi — mintaqa davlatlarini asosiy ekologik muammolar bo‘yicha muvofiqlashtirilgan yechimlar ishlab chiqish uchun birlashtirishdir. Jumladan, Orol dengizini saqlab qolish, Kaspiy havzasi muammolari, yashil moliyalashtirishni rivojlantirish va past uglerodli texnologiyalarni joriy etish masalalari muhokama qilinadi.

Tadbir yakunida 2026–2030-yillarga mo‘ljallangan qo‘shma tashabbuslar, deklaratsiyalar va harakatlar dasturini ishlab chiqish rejalashtirilgan.