O‘zbekiston Respublikasi Ekologiya va iqlim o‘zgarishi milliy qo‘mitasi

Bu haqda Vazirlar Mahkamasining "O‘zbekiston milliy tabiiy meros obyektlari to‘g‘risidagi nizomni tasdiqlash haqida"gi 106-sonli qarorida belgilab qo‘yildi. 

Qarorga ko‘ra, tabiiy obyektni O‘zbekiston milliy tabiiy meros obyektlari ro‘yxatiga kiritish uchun biofizik jarayonlar va relyef shakli buzilmagan bo‘lishi, bioxilma-xillikni saqlash, mintaqa va ekotizimlarga xos fauna va flora yashash hududlari hamda ularning arealini qamrab olishi, ko‘chib yuruvchi turlarning yashash hududlari, ko‘payish va uyalash joylari, bioxilma-xillik yoki insoniyat uchun ahamiyatli gidrologik obyektlar hamda boshqa jihatlar talab qilinadi.

Shuningdek, tabiiy obyektni milliy meros ro‘yxatiga kiritish bo‘yicha davlat organlari, xo‘jalik birlashmalari, nodavlat notijorat tashkilotlari va fuqarolar taklif kiritish huquqiga ega bo‘ldi. Ro‘yxatga kiritilgan obyektlarning hududlari va chegaralari aniq belgilanadi. Ushbu hududlarda tabiiy muhitga zarar yetkazishi mumkin bo‘lgan faoliyat turlari cheklanadi yoki taqiqlanadi.

Ushbu nizom talablari milliy tabiiy meros obyektlarini kelgusida YUNESKO va boshqa xalqaro tashkilotlarning nufuzli ro‘yxatlariga kiritish uchun huquqiy asos bo‘lib xizmat qiladi.