O‘zbekiston Respublikasi Ekologiya va iqlim o‘zgarishi milliy qo‘mitasi

Unda O‘zbekiston Respublikasi Prezidentining ekologiya masalalari bo‘yicha maslahatchisi — Ekologiya va iqlim o‘zgarishi milliy qo‘mitasi raisi Aziz Abduhakimov, BMT Taraqqiyot dasturining O‘zbekistondagi doimiy vakili Akiko Fujii, Oliy Majlis Qonunchilik palatasi aʼzosi, O’zbekiston Respublikasi Oliy Majlisi Qonunchilik palatasi Fan, taʼlim, madaniyat, sport va yoshlar masalalari qo‘mitasi aʼzosi Vasila Fayziyeva, ko‘rgazma muallifi, taniqli rassom,  “Shuhrat” medali sohibi Dilorom Mamedova, san’at ixlosmandlari, yosh ekofaollar va ommaviy axborot vositalari vakillari ishtirok etdi.

Tadbirda nutq so‘zlagan Aziz Abduhakimov bugungi kunda Prezident tashabbusi bilan Yangi O‘zbekistonda barcha sohalarda, xususan, rassomchilik borasida ham yangi davr boshlanganligini e’tirof etdi: 

“Yurtimiz rassomlari yaratilgan imkoniyatlardan ruhlanib, xalqaro maydonlarda o‘z iste’dodini namoyon etishmoqda. Atrof-muhitni asrash sohasiga bo‘lgan alohida e’tibor sabab so‘nggi yillarda O‘zbekistonda mavzuga doir qator yirik xalqaro plenerlar tashkil etildi. Xorijiy mamlakatlar haykaltaroshlari ishtirokida Xalqaro haykaltaroshlik simpoziumlarini o‘tkazish yaxshi an’anaga aylanib ulgurdi. “ARTepa” galereyasi ushbu yo‘nalishdagi navbatdagi yirik loyiha bo‘lib, madaniy qadriyatlarni saqlash, yaratish, o‘rganish, targ‘ib etish va rivojlantirishga xizmat qiluvchi madaniy muassasa hisoblanadi. Ushbu san’at galereyasi o‘z faoliyatida atrof-muhitni asrash, barqaror rivojlanish, ekologik madaniyatni shakllantirish va iqlim o‘zgarishi masalalariga bag‘ishlangan ilmiy, madaniy-ma’rifiy tashabbuslarni qo‘llab-quvvatlaydi hamda ushbu yo‘nalishlardagi san’at va ilmiy g‘oyalarni targ‘ib etadi”.

Rais birinchi ko‘rgazma sifatida aynan “Dilorom Mamedovaning 100 noyob asari” ko’rgazmasi tanlanganligi bejizga emasligini ta'kidladi:

“Rassomning asarlari ona Vatanga muhabbat, milliy an’analarga hurmat va inson qalbini chuqur his etish ruhi bilan sug‘orilgan. Uning o‘ziga xos badiiy uslubi o‘zbek xalqining boy madaniy merosi — urf-odatlari, an’analari va ma’naviy qadriyatlarini o‘zida aks ettiradi. Shuningdek, ko‘rgazmaga bag‘ishlab rassomning barcha asarlari jamlangan maxsus katalog ham nashr etildi. Ushbu katalog san’at ixlosmandlari uchun ulkan estetik ilhom manbai bo‘lishi bilan birga, yurtimiz boy madaniy merosini targ‘ib qiluvchi qimmatbaho to‘plamdir”.

Ochilish davomida san’at ixlosmandlari Dilorom Mamedovaning noyob va betakror asarlari bilan yaqindan tanishishdi. Rassomning asarlari Vatanga muhabbat, milliy an’analarga hurmat va inson qalbini chuqur his etish bilan sug‘orilgan. Uning o‘ziga xos va osongina taniladigan badiiy uslubi o‘zbek xalqining boy madaniy merosini — urf-odatlari, an’analari va ma’naviy qadriyatlarini aks ettiradi.

“ARTepa san’at galereyasida birinchi bo‘lib mening ko‘rgazmam ochilganligi men uchun katta baxt. Ko‘rgazmaga yangi asarlarim qo‘yilgan. Har bir rasmga yangicha uslubda yondashganman. Jumladan, abstraksiya, realizm, falsafiy yo‘nalishdagi, tabiat manzaralari aks etgan suratlarni ko‘rishingiz mumkin, — dedi Dilorom Mamedova. — Maqsadim O‘zbekistonning boy tabiati, madaniy merosini butun dunyoga tanitish va kelajakda bu borada yana bir qancha ko‘rgazlar tashkil etishni maqsad qilganman”.

Rassom o’zining ko’rgazmaga qo’yilgan 100 noyob suratlarini “Green University”ga sovg’a qildi.

Ma’lumot uchun, 2022-yildan buyon mamlakatimizda turli davlatlardan kelgan qariyb 100 nafar mashhur rassom ishtirokida beshta yirik xalqaro plener o‘tkazildi. Ushbu ijodiy uchrashuvlar doirasida 2000 ga yaqin noyob rang-tasvir va grafika asarlari yaratildi. Bugungi kunda ushbu keng qamrovli to‘plam fondlarda hamda ekspozitsiyalarda saqlanib, O‘zbekiston milliy badiiy merosining muhim qismi sifatida e’tirof etilmoqda.

Asarlarda mamlakatimiz va boshqa davlatlarning madaniy merosi, turkiy xalqlarning milliy liboslari, turli mamlakatlarning betakror tabiati, hayvonot olami va boshqa ko‘plab mavzular aks etgan.

“Dilorom Mamedovaning 100 ta noyob asari” ko‘rgazmasi ikki oy davom etadi.