O‘zbekiston Respublikasi Ekologiya va iqlim o‘zgarishi milliy qo‘mitasi

Muzokaralar davomida tomonlar atrof-muhitni muhofaza qilish, barqaror rivojlanish hamda zamonaviy ekologik muammolarga qarshi kurash yo‘nalishlarida ikki tomonlama hamkorlikni yanada rivojlantirish istiqbollarini muhokama qildilar. Shuningdek, ekologik muammolar global xususiyatga ega ekanligi, ularni samarali hal etish va atrof-muhitni hozirgi hamda kelajak avlodlar uchun asrab-avaylash maqsadida davlatlar o‘rtasida hamkorlikni kuchaytirish zarurligi ta’kidlandi.

Uchrashuv yakunida O‘zbekiston Respublikasi Ekologiya va iqlim o‘zgarishi milliy qo‘mitasi hamda Yaponiya atrof-muhit vazirligi o‘rtasida atrof-muhitni muhofaza qilish sohasida hamkorlik memorandumi imzolandi.

Mazkur hujjat tenglik va o‘zaro manfaat tamoyillari asosida, barqaror rivojlanish maqsadlari, milliy qonunchilik hamda xalqaro ekologik bitimlarni inobatga olgan holda hamkorlikni rivojlantirishni nazarda tutadi. Memorandumga muvofiq, hamkorlik iqlim o‘zgarishiga qarshi kurash, atmosfera havosi ifloslanishini kamaytirish, suv resurslari ifloslanishining oldini olish hamda chiqindilarni boshqarish tizimini takomillashtirish kabi bir qator muhim yo‘nalishlarni qamrab oladi.

Shuningdek, uchrashuvlar, konferensiyalar, simpoziumlar va seminarlar o‘tkazish, ikki mamlakat mutaxassislari va ekspertlari o‘rtasida axborot almashish orqali salohiyatni oshirishga qaratilgan qo‘shma tadbirlarni amalga oshirish ham rejalashtirilgan.

Memorandum O‘zbekiston va Yaponiya o‘rtasidagi ekologik hamkorlikni yanada kengaytirish, shuningdek, atrof-muhit holatini yaxshilashga qaratilgan qo‘shma loyihalarni amalga oshirish uchun mustahkam asos yaratadi.