Uchrashuvda O‘zbekiston va Germaniya o‘rtasida ekologiya, atrof-muhitni muhofaza qilish va iqlim o‘zgarishining salbiy oqibatlariga qarshi kurashish bo'yicha strategik hamkorlikni kengaytirish masalalari muhokama qilindi.

Jumladan, O‘zbekiston va Germaniya o‘rtasida “Yashil Markaziy Osiyo” tashabbusi, shishani qayta ishlash innovatsion tizimini joriy etish bo‘yicha investitsiya loyihasi, qayta ishlash zavodi qurish, shuningdek, Milliy iqlim markazi bilan hamkorlikda amalga oshiriladigan masalalar muhokamalar markazida bo'ldi. 

Shuningdek, Oʻzbekiston tomoni Markaziy Osiyo atrof-muhit va iqlim o'zgarishini o'rganish universiteti (Green University)da nemis tili oʻquv dasturlarini joriy etish, talabalar almashinuvini yo'lga qo'yish va Germaniya universitetlari bilan yaqin hamkorlik aloqalarini oʻrnatishdan manfaatdor ekanligini bildirdi.

Uchrashuv yakunida kelgusida aniq loyiha va tashabbuslar uchun asos bo‘ladigan hamkorlik memorandumini ishlab chiqish bo‘yicha kelishib olindi. Qayd etish joizki, kelgusida asosiy e’tibor ekologik ta’limni rivojlantirish, ilg‘or tajriba va texnologiyalar almashinuvini yo'lga qo'yish, innovatsion loyihalarni qo‘llab-quvvatlash kabi jihatlarga qaratiladi.