Samarqandda daraxt kesgan qoidabuzar 9 million so‘mdan ziyod jarima to‘laydigan bo'ldi
2024-06-13 01:05:00 / Yangiliklar
Samarqand viloyati Ekologiya boshqarmasi Narpay tuman bo‘limi davlat inspektorlari tomonidan tumanda daraxtlar kesilishi bilan bog‘liq vaziyat o‘rganildi.
O‘rganishlar davomida fuqaro U.I. tumanning Islomobod mahallasidagi joylashgan 6-sonli davlat maktabgacha ta’lim muassasasi hududida sog‘lom terakni kesib tashlaganligi ma'lum bo'ldi.
Ushbu holat yuzasidan huquqbuzarga nisbatan O‘zbekiston Respublikasi MJtKning 79-moddasi 1-qismi bilan ma’muriy bayonnoma rasmiylashtirilib, tabiatga yetkazilgan 1 020 000 so‘m zarar va BHMning 25 baravari, ya'ni, 8 500 000 so‘m miqdorida jarima qo'llanilgan.
Eslatib o‘tamiz, davlat o‘rmon fondiga kirmaydigan daraxt va butalarni kesishga moratoriy joriy etilgan davrda tegishli ruxsatnomasiz daraxtlarni kesish qat’iyan man etiladi. Bunday huquqbuzarliklar uchun jarima miqdori 5 barobarga, zarar miqdori esa 2 barobarga oshirilgan holda qo'llaniladi.