O‘zbekiston Respublikasi Ekologiya va iqlim o‘zgarishi milliy qo‘mitasi

Tadbir davomida Yangi O‘zbekistonda davlat va din o‘rtasidagi munosabatlarning huquqiy asoslari, vijdon erkinligini ta’minlash, bag‘rikenglik muhitini mustahkamlash hamda diniy sohada olib borilayotgan islohotlarga e'tibor qaratildi. Xususan, Oʻzbekiston Respublikasida fuqarolarning vijdon erkinligini taʼminlash va diniy sohadagi davlat siyosati konsepsiyasi  bu borada muhim ahamiyatga ega ekanligi qayd etildi.

Ta'kidlash joizki, Konsepsiyada davlatchiligimiz rivojining boy milliy-tarixiy tajribasiga va umuminsoniy qadriyatlarga tayangan holda ishlab chiqilgan boʻlib, koʻpmillatli va koʻpkonfessiyali Oʻzbekistonda umumjamiyat manfaatlarini roʻyobga chiqarish, demokratiya, dunyoviylik, erkinlik, tenglik, ijtimoiy adolat va birdamlik asosida oʻzaro totuvlikda yashash hamda izchil taraqqiy etish uchun zarur barqaror muhitni taʼminlashga qaratilgan.

Tadbirda dunyoviy davlatda diniy qadriyatlar ham muhim oʻrin tutishi, bu qadriyatlar Oʻzbekiston xalqining madaniyati, turmush tarzi, urf-odatlari, odob-axloqi shakllanishiga hamda ularning avloddan-avlodga meros boʻlib oʻtishiga xizmat qilib kelayotganligi aytib o‘tildi. Qolaversa, diniy eʼtiqodlar va diniy bagʻrikenglik, dinlarning asl insonparvarlik mohiyati jamiyatning maʼnaviy-axloqiy asoslaridan biri boʻlib, Oʻzbekiston xalqini birlashtirish va jipslashtirishga xizmat qiluvchi, oilalarda oʻzaro hurmat-izzat va mehr-oqibatni mustahkamlovchi asriy qadriyatlar manbai ekanligi ta'kidlandi.

Shuningdek, internetdagi dinni niqob qilib olgan yot g‘oyalar ta'siriga tushib qolmaslik, har xil xabar va ma'lumotlarga ishonmaslik, diniy mavzuda savol tug‘ilganda faqat ishonchli manbalarga, xususan, O‘zbekiston musulmonlari idorasi huzuridagi Fatvo markazi qoshida tashkil qilingan 1171 qisqa raqamiga murojaat qilish lozimligi qayd etildi.