O‘zbekiston Respublikasi Ekologiya va iqlim o‘zgarishi milliy qo‘mitasi

So‘nggi oylarda suv havzasi juda qoniqarsiz holatga kelib qolgan: kanal o‘zani chiqindilar va ifloslangan oqovalar bilan to‘lib ketgan, qirg‘og‘i maishiy chiqindilar bilan ifloslangandi. Issiq mavsumda bu holat yaqin atrofda yashovchi aholi uchun jiddiy noqulaylik tug‘dirib, ehtimoliy sanitariya xavfini keltirib chiqargan. Gap faqat shahar muhitining estetik ko‘rinishi haqida emas, balki aholi salomatligi, ekotizim holati va umumiy hayot sifatiga salbiy ta’sir haqida borayotgan edi.

Jamoatchilik kengashi zudlik bilan tegishli vakolatli tashkilotlarga murojaat yo‘lladi. Qisqa muddat ichida kanal o‘zanini tozalandi va atrof tartibga keltirildi. Ayniqsa, Ekologiya qo‘mitasi huzuridagi Davlat ekologik nazorati inspeksiyasi hamda sohaga oid xizmatlarning tezkor va samarali faoliyati natijasida kanal va uning sohil qismi tozalandi.

Shu o‘rinda ta’kidlash joizki, bunday muammolar o‘z-o‘zidan yuzaga kelmaydi. Aksariyat hollarda ayrim fuqarolarning atrof-muhitga nisbatan mas’uliyatsiz munosabati sabab bo‘ladi. Suv havzalari va ko‘chalar tozaligi — har bir insonning umumiy mas’uliyatidir.

Jamoatchilik kengashi barchani tabiatga ehtiyotkorlik bilan munosabatda bo‘lish, hududlarni ifloslantirmaslik va ekologik barqarorlikni saqlash — mamlakatimiz aholisi sog‘lig‘i, xavfsizligi va munosib kelajagiga qo‘shilgan hissa ekanini unutmaslikka chaqirib qoladi.