O‘zbekiston Respublikasi Ekologiya va iqlim o‘zgarishi milliy qo‘mitasi

Ushbu jarayon quyidagi asosiy bosqichlarni o‘z ichiga oladi:

1. Atrof-muhitga ta’sirni baholash materiallarini tayyorlash

Loyihani ishlab chiquvchi tashkilot rejalashtirilayotgan faoliyatning atrof-muhitga ehtimoliy ta’sirini o‘rganadi. O‘tkazilgan tahlillar asosida atrof-muhitga ta’sirni baholash (AMTB) materiallari ishlab chiqiladi. Ushbu hujjatlar tarkibida loyihaning atrof-muhitga, aholi salomatligiga va hududning ekologik holatiga ta’siri baholanadi, shuningdek, mumkin bo‘lgan salbiy oqibatlarning oldini olish, kamaytirish va kompensatsiya qilish chora-tadbirlari belgilanadi.

2. Jamoatchilik eshituvlarini o‘tkazish

Tayyorlangan AMTB materiallari jamoatchilik muhokamasiga qo‘yiladi. Jamoatchilik eshituvlari jarayonida fuqarolar, mutaxassislar va boshqa manfaatdor tomonlar loyiha bo‘yicha o‘z fikr-mulohazalari va takliflarini bildirishadi. Muhokama yakunlari bo‘yicha jamoatchilik eshituvlari protokoli rasmiylashtiriladi va belgilangan tartibda tasdiqlanib, davlat ekologik ekspertizasiga taqdim etiladigan hujjatlarga ilova qilinadi.

3. Davlat ekologik ekspertizasini o‘tkazish

Davlat ekologik ekspertizasi markazi ekolog-ekspertlari taqdim etilgan AMTB materiallari, jumladan, jamoatchilik eshituvlari protokolining amaldagi qonunchilik talablariga muvofiqligini ko‘rib chiqadi. Ekspertiza jarayonida loyihani amalga oshirishning ekologik xavfsizligi, uning tabiatni muhofaza qilish me’yorlariga muvofiqligi, shuningdek, ehtimoliy ekologik va ijtimoiy xatarlar baholanib, ularning oldini olish yoki kamaytirishga qaratilgan chora-tadbirlar ko‘rib chiqiladi.

4. Davlat ekologik ekspertizasi xulosasini rasmiylashtirish

O‘tkazilgan ekspertiza natijalariga ko‘ra loyihani amalga oshirish mumkin yoki mumkin emasligi to‘g‘risida rasmiy xulosa beriladi. Ushbu xulosa rejalashtirilayotgan faoliyatni amalga oshirish yoki rad etish bo‘yicha qaror qabul qilish uchun huquqiy asos hisoblanadi.