O‘zbekiston Respublikasi Ekologiya va iqlim o‘zgarishi milliy qo‘mitasi

Eshituvlar Namangan tumani “Namangan suv ta’minoti” filialida, shuningdek, loyiha doirasiga kiruvchi “Ravnaq”, “Saxovat”, “Qo‘shchinor”, “Urganchi” va “Beshkapa” mahalla fuqarolar yig‘inlarida tashkil etildi. Unda Namangan viloyati va tuman hokimligi mas’ullari, “Namangan suv ta’minoti” AJ vakillari, “Namangan Metito” korxonasi rahbariyati hamda “JURU” tashkilotining ekologiya va ijtimoiy masalalar bo‘yicha mutaxassislari, mahallalar raislari, faol fuqarolar, fermer xo‘jaliklari vakillari hamda tegishli tashkilotlar mutaxassislari ishtirok etdi.

Ochiq muloqot shaklida tashkil etilgan eshituv aholining fikr-mulohazalarini o‘rganish, loyiha mazmun-mohiyatini tushuntirish hamda mavjud ekologik muammolar yuzasidan savollarga javob berishga qaratildi. Mutaxassislar tomonidan loyihaning ekologik va ijtimoiy ta’siri, qurilish hududi holati, zamonaviy texnologiyalar qo‘llanilishi hamda oqova suvlarni tozalash samaradorligi haqida batafsil ma’lumot berildi.

Ma'lumot uchun, loyihada Namangan tumanida mavjud oqova suvlarni tozalash tizimini modernizatsiya qilish va yangi, zamonaviy tozalash inshootini barpo etish ko‘zda tutilgan. Loyiha doirasida 3,5 gektar maydonda yangi inshoot rekonstruksiya qilinishi, zamonaviy xorijiy texnologiyalar asosida mexanik va biologik tozalash jarayonlari joriy etilishi, yangi kanalizatsiya quvurlari o‘rnatilishi rejalashtirilgan. Shuningdek, asosiy chiqish nuqtalariga maxsus nazorat detektorlari o‘rnatilib, oqova suvlarning sifat ko‘rsatkichlari doimiy monitoring qilinadi.

Jamoatchilik eshituvlari davomida aholi tomonidan kanalizatsiya tizimidan chiqayotgan noxush hid, qishloq xo‘jaligi yerlarining zararlanishi, daryoga oqizilayotgan oqova suvlar hamda eskirgan quvurlar muammosiga e'tibor qaratildi. Mutaxassislar tomonidan loyiha takomillashtirilganligi, xalqaro va milliy standartlarga muvofiqlashtirilgani hamda zamonaviy texnologiyalar asosida ishlab chiqilgani qayd etildi. Unga ko‘ra, loyiha amalga oshirilishi natijasida badbo‘y hid muammosi kamayishi, ochiq oqizilayotgan oqova suvlar to‘liq tozalanishi va atrof-muhitga salbiy ta’sirning oldi olinishi kutilmoqda.

Eshituvlar yakunida ishtirokchilar loyiha yuzasidan o‘z fikr va takliflarini bildirib, ekologik va ijtimoiy jihatlarni inobatga olgan holda loyiha bosqichma-bosqich va shaffof tarzda amalga oshirilishi zarurligini ta’kidladilar.