O‘zbekiston Respublikasi Ekologiya va iqlim o‘zgarishi milliy qo‘mitasi

Tadbir Jamoatchilik kengashi a’zolari uchun tashkil etilgan ikki haftalik o‘quv kursi yakunlariga ko‘ra o‘tkazildi. O‘quv kursi atrof-muhitni muhofaza qilish sohasida faoliyat yurituvchi xodimlarni qayta tayyorlash va malakasini oshirish markazida tashkil etilib, jamoatchilik ekologik nazorati sohasidagi bilim va amaliy ko‘nikmalarni oshirishga qaratildi.

Dastur doirasida ishtirokchilar O‘zbekiston Respublikasida atrof-muhitni muhofaza qilishning huquqiy asoslari va korrupsiyaga qarshi kurash sohasidagi davlat siyosatining asosiy yo‘nalishlari, ekologik ta’lim va madaniyatni shakllantirishning ustuvor yo‘nalishlari, jamoatchi ekologik inspektorlar hamda nodavlat notijorat tashkilotlari tomonidan jamoatchilik ekologiya nazoratini amalga oshirish mexanizmlarini o‘rgandilar.

Shuningdek, o‘quv jarayonida atrof-muhitni muhofaza qilish va tabiiy resurslardan oqilona foydalanish sohasida zamonaviy axborot-kommunikatsiya texnologiyalarini qo‘llash, “Yashil makon” umummilliy loyihasini amalga oshirish hamda “yashil” iqtisodiyotni rivojlantirishga qaratilgan islohotlar samaradorligini oshirish masalalari qamrab olindi. 

Shuningdek, atmosfera havosini muhofaza qilish, o‘simlik va hayvonot dunyosi obyektlari, yer va suv resurslaridan oqilona foydalanish va muhofaza qilish, chiqindilar bilan bog‘liq faoliyatni muvofiqlashtirish va nazorat qilish masalalariga alohida e’tibor qaratildi. Dastur amaliy mashg‘ulotlarni ham o‘z ichiga oldi.

O‘quv yakunida tinglovchilarga jamoatchilik ekologiya nazoratini amalga oshirishda ishtirok etish va ekologik xavfsizlikni ta’minlashga ko‘maklashishga tayyor ekanliklarini tasdiqlovchi tegishli sertifikat va Jamoatchilik ekologiya nazoratchisi guvohnomalari topshirildi.

Ma'lumot uchun, hozirgi vaqtda Qayta tayyorlash va malaka oshirish markazida 100 ga yaqin tinglovchi tahsil olmoqda. Umuman olganda, joriy yilda mazkur yo‘nalish bo‘yicha 735 nafar tinglovchini o‘qitish rejalashtirilgan.