Tabiatni asrash Navoiy uchun insoniy burch, Bobur uchun davlatchilikning muhim qismidir
2026-02-12 09:00:00 / Yangiliklar
Tadbirda Alisher Navoiy hamda Zahiriddin Muhammad Bobur ijodida tabiat mavzusiga alohida e'tibor qaratildi. Xususan, O‘rmon agentligi rahbari Erkin Muhiddinov ajdodlarimizdan bebaho ma'naviy meros qolganligini e'tirof etgan bo‘lsa, filologiya fanlari doktori, professor Nurboy Jabborov buyuk mutafakkirlar ijodida globallashuv muammolari muhim o‘rin tutganini ta'kidladi. Yozuvchilar uyushmasi a'zosi, shoir Shuhrat Orif esa Navoiy va Bobur ijodida tabiat mavzusiga e'tibor qaratdi.
Alisher Navoiy tabiatni faqat manzara sifatida emas, Yaratganning ne'mati va inson ma'naviyatining bir qismi sifatida ifodalagan. Uning nazdida tabiatni asrash komil insonning axloqiy burchlaridan biri hisoblangan. "Xamsa" asarida bog‘ poklik va go‘zallik ramzi, bog‘larni asrash esa inson qalbini asrash bilan tenglashtiriladi.
Bobur esa tabiatni juda aniq, real va muhabbat bilan tasvirlagan. U shoh sifatida bog‘lar, suv inshootlari barpo qilgan bo‘lsa, shoir o‘laroq atrof-muhitning buzilishidan afsuslangan, insonlarning tabiatga zarar yetkazishi ayanchli oqibatlarga olib kelishiga e'tibor qaratgan. Bobur tabiat bilan uyg‘un yashashni davlatchilikning muhim qismi deb hisoblagan.
Tadbir davomida Navoiy va Bobur ijodidan eng sara namunalar o‘qildi, kuy-qo‘shiqlar kuylandi.