O‘zbekiston Respublikasi Ekologiya va iqlim o‘zgarishi milliy qo‘mitasi

Ijtimoiy tarmoqlarda “Qizilqum fosforit kompleksi" korxonasi atmosfera havosini ifloslantirayotganligi haqida xabar tarqaldi. Holat yuzasidan Navoiy viloyati ekologiya va iqlim o‘zgarishi bosh boshqarmasi tomonidan tekshiruv o‘tkazildi.

Tekshiruv natijalariga ko‘ra, Konimex tumanida joylashgan korxonaga tegishli ishlab chiqarish sexlarida Davlat ekologik ekspertiza xulosasida belgilangan talablar to‘liq bajarilmaganligi, shuningdek, atmosfera havosiga ifloslantiruvchi moddalar meʼyordan ortiq chiqarilganligi aniqlandi. Xususan, 28-sonli manbadan chiqarilgan fosforit changi belgilangan meʼyordan 3,5 barobar yuqori ekanligi qayd etildi.

Bundan tashqari, korxona tomonidan Konimex tumanida joylashgan “Tashkura” karyerida noruda qazilmalarini qazib olish va foydalanish uchun “Atrof muhitga taʼsirini baholash arizasi" ishlab chiqilgan bo‘lib, hozirgi kunga qadar Davlat ekologik ekspertizasi xulosasi rasmiylashtirilmagan.

Aniqlangan qonunbuzarliklarni bartaraf etish hamda atrof-muhitga salbiy taʼsirning oldini olish maqsadida korxonaning 2 ta ishlab chiqarish sexi vaqtinchalik 10 kun muddatga to‘xtatildi. 

Tekshiruv davomida aniqlangan holatlar yuzasidan atmosfera havosini ifloslantirish, oqova suvlar oqizish va chiqindilarni joylashtirish bilan bog‘liq huquqbuzarliklar uchun jami 2 milliard 42 million 192 ming 877 so‘m miqdorida kompensatsiya to‘lovlari hisoblandi.

Shu bilan birga, 5 nafar masʼul mansabdor shaxslarga nisbatan maʼmuriy bayonnoma rasmiylashtirilib, to‘plangan hujjatlar maʼmuriy chora ko‘rish maqsadida Konimex tuman sudiga yuborildi.