Oʻzbekistonda issiqxona uchun eng maqbul hudud qaysi?
2026-01-28 11:15:00 / Yangiliklar
Tabiiy issiqlik manbai
Oʻzbekistonning janubida joylashgan Surxondaryo viloyati yurtimizning eng quyoshli oʻlkalaridan biri hisoblanadi. Hududdagi tabiiy issiqlik esa meva-sabzavotlar, poliz ekinlari va boshqa mahsulotlarning pishib yetilishi uchun ayni muddao hisoblanadi. Ayniqsa, quyoshning tabiiy harorati issiqxonalar faoliyatini ancha yengillashtiradi.
“Surxondaryoda sabzavot boʻladimi, poliz ekinlarimi, kartoshka yoki karammi, umuman, barcha mahsulotlar boshqa hududlarga qaraganda 20–30 kun oldin pishib yetiladi. Tadbirkorlar uchun eng qulay tomoni, issiqxonalarda alohida isitish tizimi qilish shart emas, hech qanday yoqilgʻisiz ham ekin ekib, daromad olish mumkin”, — deydi dehqon xoʻjaligi rahbari Boboyor Xolboyev.
Kam xarajat, moʻmay daromad
Ayni damda aholining koʻchatga boʻlgan talabi 2 barobar oshgan. Bu esa tadbirkorlarga Surxondaryo iqlimidan foydalangan holda aholining ehtiyojini ortigʻi bilan qondirib, issiqxonalardan moʻmay daromad olish imkonini beradi. Yaʼni bu yerda tomorqasi bor va undan unumli foydalangan inson kambagʻal boʻlmaydi.
“Biz Surxondaryoda hatto anomal sovuqda ham daromad olamiz, koʻp xarajat ham talab qilinmaydi. Biz –24 daraja sovuqda ham hech narsa yoqmadik, tabiiy issiqlik yetarli boʻldi”, — deydi dehqon Akbar Mamatmoʻminov.
Eng qulay lokatsiya
“Ayaka” xorijiy korxonasi tomonidan Termizda 12 gektar yerga issiqxona tashkil qilingan. Korxona ijrochi direktori Shokir Safarqulov daromad yaxshi ekanligini, 2–3 mln dollarlik investitsiya kirib kelishini aytib oʻtdi. U issiqxona bilan shugʻullanadigan tadbirkorlarga Surxondaryoga kelishni tavsiya qildi.
Albatta, Surxondaryo viloyatidagi tabiiy issiq iqlim, qulay muhit, shart-sharoit tadbirkorlarga kam xarajat orqali katta miqdorda foyda olish imkonini yaratadi. Bu, ayniqsa, daromadi issiqxona bilan bogʻliq boʻlganlar uchun eng qulay lokatsiyadir.