Markaz faoliyati manfaatdor vazirliklar, idoralar, xoʻjalik yurituvchi subyektlar va keng jamoatchilikning global va milliy miqyosda ekologik kimyoviy konvensiyalarning bajarilishi toʻgʻrisida xabardorligini oshirishga qaratilgan. ARMda xavfli kimyoviy moddalar va chiqindilarni boshqarish sohasidagi ekologik konvensiyalar bo'yicha ma'lumotlar aniqlanadi, jamlanadi va tarqatiladi. Shuningdek, markaz respublikaning bu boradagi salohiyatini oshirishga yordam berish uchun tashkil qilingan. 

Shu bilan birga, ARM va foydalanuvchilar o‘rtasidagi o‘zaro hamkorlik uchun ecochem.uz sayti ishga tushirildi. Saytda uchta kimyoviy konvensiya – Bazel, Rotterdam va Stokgolmning asosiy qoidalari bo'yicha qisqa onlayn kurs ham mavjud.  Kurs uchta kimyoviy konvensiya, sinergiya masalalari va konvensiya qoidalarini amalga oshirishda mamlakatlar duch keladigan muammolar haqida umumiy tushuncha beradi.

Axborot-resurs markazi va veb-sayti Ekologiya, atrof-muhitni muhofaza qilish va iqlim o‘zgarishi vazirligi hamda Birlashgan Millatlar Tashkilotining Atrof-muhit bo‘yicha Dasturi (UNEP)ning "HealthandEnvironmentJusticeSupporte.V" (Germaniya) bilan hamkorlikda “O‘zbekiston Respublikasining Bazel va Stokgolm konvensiyalari va GHSni amalga oshirishda institutsional salohiyatini mustahkamlash, shuningdek, Rotterdam va Minamata konventsiyalariga qo‘shilishga ko‘maklashish” loyihasi doirasida yaratildi.

Maqsadlarga erishish uchun ARMda xavfli kimyoviy moddalar va chiqindilarni boshqarish sohasidagi ekologik konvensiyalar bo‘yicha axborot-kutubxona resurslari fondi shakllantiriladi, fond kimyoviy moddalar va chiqindilarni boshqarish bo‘yicha ilmiy ma’lumotnoma va ilmiy-ommabop materiallar bilan to‘ldiriladi. Qolaversa, markaz elektron ommaviy axborot vositalari, yetakchi respublika nashriyotlari va xorijiy davlatlar nashriyotlarida chop etilgan eng yangi kimyoviy, tibbiy, turdosh va boshqa adabiyotlar bilan boyitiladi.