Korxonalarga avtomatik monitoring stansiyalari o‘rnatish bo’yicha majburiy ko‘rsatmalar berildi
2026-01-19 14:55:00 / Yangiliklar
Ma’lumot uchun, “Procab” MChJ Q/K turli diametrga ega alyumin va mis kabellari, “Alutex” MChJ alyuminiy profillar, “Asl Oyna” MChJ shisha buyumlar ishlab chiqarish bilan shug‘ullanadi va atrof-muhitga ta’sir ko‘rsatish darajasi yuqori xavfli toifadagi obyekt hisoblanadi.
Korxonalar tomonidan atmosferaga azot ikki oksidi, uglerod oksidi, alyuminiy va mis oksidlari chiqariladi. Ushbu korxonalar tomonidan atmosferaga tashlanayotgan gazlarni tahlil qiluvchi avtomatik monitoring stansiyasi o‘rnatilmagan.
“PROFPACK” MChJ gofrirovka qilingan qog‘oz va karton ishlab chiqarish bilan shug‘ullanib, atrof-muhitga ta’sir ko‘rsatish toifasi past darajada xavfli obyekt hisoblanadi.
O‘zbekiston Respublikasi Prezidentining 2023-yil 31-maydagi PF-81-son Farmonida atrof-muhitga ta’siri yuqori bo‘lgan I va II toifali obyektlar “atmosfera havosiga ustuvor turg‘un (tashkilashtirilgan) ifloslantiruvchi manbalardan chiqadigan tashlanmalarni tahlil qiluvchi avtomatik monitoring stansiyalarini o‘rnatish”lari, aks holda kompensatsiya to‘lovlari besh baravar oshirilgan holda hisoblanishi belgilangan.
O‘rganishlar davomida yuqoridagi korxonalar tomonidan ifloslantiruvchi moddalarni avtomatik nazorat qiluvchi monitoring stansiyalari o‘rnatilmaganligi ma’lum bo‘ldi.
Ushbu korxonalarga avtomatik monitoring stansiyasini o‘rnatish yuzasidan majburiy yozma ko‘rsatmalar berildi hamda avtomatik monitoring stansiyasini o‘rnatmagan taqdirda kompensatsiya hisobotlari besh baravar oshirilgan holda to‘lanishi to‘g‘risida ogohlantirildi.
Ma’lumot uchun, Prezidentning 2025-yil 30-yanvardagi 16-son Farmonida “atmosfera havosi ifloslanishi fon monitoringi stansiyalarini o‘rnatgan korxonalarga kompensatsiya to‘lovlarining 50 foizigacha bo‘lgan qismini ikki yil davomida qaytarish, monitoring stansiyalarini o‘rnatgan korxona kelgusi bir yil davomida chang-gaz va lokal suv tozalash uskunalarini o‘rnatganda, tabiatga zarar yetkazish bo‘yicha respublika byudjetiga yo‘naltiriladigan kompensatsiya to‘lovlarining 70 foizigacha bo‘lgan qismini ikki yil davomida qaytarish” tartibi joriy etilgan.