O‘zbekiston Respublikasi Ekologiya va iqlim o‘zgarishi milliy qo‘mitasi

Xususan, Abu-Dabi Atrof-muhitni muhofaza qilish agentligi boshqaruv direktori Razan Xalifa Al Muborak bilan uchrashuv bo‘lib o‘tdi. Tomonlar atrof-muhitni muhofaza qilish va bioxilma-xillikni saqlash bo‘yicha dasturlarni amalga oshirish masalalarini muhokama qildi, amaldagi loyihalarni ko‘rib chiqdi hamda tabiiy resurslarni barqaror boshqarish va ekologik himoyaga qaratilgan qo‘shma tashabbuslarni rivojlantirish bo‘yicha kelishuvlarga erishdi. Ilg‘or tajriba va texnologiyalar almashishga alohida e’tibor qaratildi. Amirlik tomoni suv resurslarini boshqarish, degradatsiyaga uchragan yerlarni tiklash hamda “yashil” energetikani rivojlantirish sohasidagi istiqbolli loyihalarni qo‘llab-quvvatlashga tayyor ekanini bildirdi.

Muzokaralarda chiqindilarni boshqarish va ekologik texnologiyalarni joriy etish masalalariga alohida e’tibor qaratildi. Xususan, "Beeah Group" kompaniyasi bosh direktori Fahad Shehail bilan uchrashuvda barqaror rivojlanish yo‘nalishida hamkorlikni kengaytirish va O‘zbekistonda qo‘shma tashabbuslarni amalga oshirish imkoniyatlari muhokama qilindi.

Yakunda Chiqindilarni boshqarish va sirkulyar iqtisodiyotni rivojlantirish agentligi hamda "Bell Energy" kompaniyasi o‘rtasida o‘zaro anglashuv memorandumi imzolandi. Hujjat kompaniya bosh direktori Haytimom Husayn bilan uchrashuv chog‘ida imzolandi va energetika hamda sirkulyar iqtisodiyot sohasidagi loyihalarni rivojlantirishga qaratildi.

ADSW doirasida ta’lim va ilmiy hamkorlikka ham katta e’tibor berildi. "Khalifa University" prezidenti va ijrochi direktori doktor Ibrohim Al Hajri bilan uchrashuvda ta’lim, ilmiy tadqiqotlar va innovatsiyalar yo‘nalishidagi hamkorlik masalalari, jumladan, ekologik loyihalarni amalga oshirish uchun mutaxassislar tayyorlash hamda barqaror rivojlanish sohasida tajriba almashish imkoniyatlari muhokama qilindi.

Shuningdek, "Abu Dhabi University" rektori, professor Gassan Audad bilan uchrashuv bo‘lib o‘tdi. Muzokaralar akademik hamkorlikni rivojlantirish, ta’lim dasturlarini yangilash va ekologik ta’lim yo‘nalishida qo‘shma tashabbuslarni joriy etishga bag‘ishlandi.

Muhokamalar davomida Markaziy Osiyo atrof-muhit va iqlim o‘zgarishini o'rganish universiteti ("Green University") bilan hamkorlikdagi qo‘shma loyihalar taklif qilindi. Jumladan, ingliz tilida ikki diplomli dasturlar, akademik almashinuv, universitetni xalqaro miqyosda targ‘ib qilish hamda xorijiy talabalarni jalb etish bo‘yicha tashabbuslar ilgari surildi.

Ekologiya va iqlim o‘zgarishi milliy qo‘mitasining Abu-Dabi barqaror rivojlanish haftaligidagi ishtiroki O‘zbekistonning faol xalqaro hamkorlikka intilayotgani, ilg‘or ekologik yechimlarni joriy etish hamda barqaror rivojlanish sohasidagi yetakchi institut va kompaniyalar bilan hamkorlikni mustahkamlashga tayyor ekanligini yana bir bor tasdiqladi.