Vazirning birinchi o‘rinbosari O.Qudratov olib borgan yig‘ilishda vazirlik markaziy apparati vakillari, tizim tashkilotlari rahbarlari hamda hudud vakillari (onlayn tarzda) ishtirok etishdi.
Unda 2025-yilning o‘tgan davrida ijro intizomining holati, erishilgan natijalar, yo‘l qo‘yilgan ayrim kamchiliklar hamda ijro intizomini yanada mustahkamlash bo‘yicha amalga oshirilishi lozim bo‘lgan ishlar tahlil qilindi.
Shuningdek, O‘zbekiston Respublikasi Prezidentining 2025-yil 25-iyuldagi “Davlat organlari va tashkilotlarida ijro intizomini yanada mustahkamlashning qo‘shimcha chora-tadbirlari to‘g‘risida”gi PF–117-son Farmonida belgilangan vazifalar mazmun-mohiyati ishtirokchilarga yana bir bor tushuntirildi.
“Ijro.gov.uz” tizimida Ekologiya va iqlim o‘zgarishi milliy qo‘mitasiga kelib tushgan O‘zbekiston Respublikasi qonunlari, O‘zbekiston Respublikasi Prezidentining farmonlari, qarorlari, farmoyishlari bo‘yicha 2025-yilning yanvar-dekabr oylarida 2605 ta topshiriq ijrosini ta’minlash belgilangan.
Joriy yilning 29-dekabr holatiga ko‘ra, mazkur topshiriqlardan 2588 tasi (yoki 99,3 foizi)ning ijrosi ta’minlandi.
2025-yilda jami topshiriqlarning 139 tasi (5,4 foizi) ijrosida muddat kechikishiga yo‘l qo‘yilgan. Qolgan topshiriqlarning barchasi belgilangan tartibda nazoratdan yechilgan.
Qonunchilik hujjatlari va topshiriqlar ijrosini ta’minlashda ijro intizomini buzgan tarkibiy bo‘linmalar va tizim tashkilotlarining mas’ul rahbar va xodimlariga nisbatan intizomiy chora tadbirlari ko‘rib borilmoqda. Ijro intizomi talablarini buzgan xodimlarga nisbatan intizomiy choralarning boshqa shakllari bilan bir qatorda ularning ustama ish haqlariga nisbatan pasaytirilgan koeffitsientlar qo‘llanilib kelinmoqda.
Tizim orqali nazoratga olingan hujjatlarning bajarilishi, jismoniy va yuridik shaxslarning murojaatlari bilan ishlash holati muhokama qilinib, har bir topshiriq ijrosini o‘z vaqtida va sifatli bajarilishini ta’minlash yuzasidan mas’ullarga topshiriqlar belgilandi.