Tadbir davomida fuqarolar B.R. va K.S.lar tomonidan noqonuniy tarzda Chirchiq daryosining "Rasulobod" MFY hududidan oqib oʻtuvchi qismi oʻng qirgʻogʻida qum-shagʻal aralashmasi qazib olinib, yuk mashinasiga ortilayotganligi ma'lum bo‘ldi. 

Holat yuzasidan huquqbuzarlarga nisbatan MJtKning 70prim 1-moddasi 1-qismi bilan maʼmuriy bayonnoma rasmiylashtirildi. Huquqbuzarlarning har biriga bazaviy hisoblash miqdorining 30 baravari — 10 million 200 ming soʻmdan jarima belgilandi.

Ma'lumot uchun, O‘zbekiston Respublikasi Prezidentining 2024-yil 17-yanvardagi “Suv havzalarida noruda materiallarni qazib olishni tartibga solish chora-tadbirlari to‘g‘risida”gi 14-sonli farmoniga asosan, 1-maydan boshlab Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga muddatsiz moratoriy joriy qilingan.  Moratoriy davrida qum-shag‘al materiallarini noqonuniy qazib olish natijasida tabiatga yetkazilgan zarar uchun undirish summalari 10 baravarga oshirilgan holda qo‘llaniladi. 

Ekologiya vazirligi va vazirlikning hududiy boshqarmalari tomonidan noqonuniy qum-shag’al materiallarini qazib olishga qarshi doimiy reyd tadbirlari olib borilmoqda. Bu boradagi har qanday huquqbuzarlik qat’iy jazolanadi!