O‘zbekiston Respublikasi Ekologiya va iqlim o‘zgarishi milliy qo‘mitasi

Ushbu hujjat aholi uchun zarur bo‘lgan tovarlarga kirish imkoniyatlarini kengaytirish, asosiy tarmoqlarni rivojlantirishni rag‘batlantirish hamda zamonaviy texnologiyalarni, jumladan, «yashil» iqtisodiyot va chiqindilarni qayta ishlash sohasida qulay sharoitlar yaratish maqsadida qabul qilindi.

Farmonga muvofiq, belgilangan tartibda shakllantirilgan ro‘yxatlar asosida, 2026-yil 1-yanvardan boshlab O‘zbekiston Respublikasiga import qilinayotgan ayrim tovarlar bojxona to‘lovlaridan ozod etiladi.

Jumladan, 2028-yil 1-yanvargacha quyidagi tovarlarga nisbatan bojxona to‘lovlarining nol stavkasi qo‘llaniladi: • elektromobillarni quvvatlantirish  stansiyalari, ularning komponentlari, shuningdek, xizmat ko‘rsatish infratuzilmasi uchun  texnologik uskunalar; • pilla yigirish va ipak gazlama to’qish dastgohlarining ehtiyot qismlari, tut daraxti urug‘i va ko‘chatlari, shuningdek, super-elita, elita va sanoat miqyosida tut ipakqurti urug‘lari.

Shuningdek, 2031-yil 1-yanvargacha maxsus texnika, texnologik uskunalar, ehtiyot qismlar, jihozlar, xom ashyo va materiallar bo‘yicha bojxona to‘lovlarining ozod qilinishi nazarda tutilgan. Bu uskunalar, agar ular O‘zbekistonda ishlab chiqarilmasa, turli turdagi chiqindilarni, jumladan, uy xo‘jaligi, qurilish va tibbiyot chiqindilarini utilizatsiya qilish hamda bio-parchalanadigan polimer materiallarini qayta ishlashda foydalaniladi.

Bundan tashqari, Farmonda chiqindilarni qayta ishlash sohasida imtiyozli soliq rejimi joriy etilgan. Xususan, 2026-yil 1-yanvardan 2031-yil 1-yanvargacha «Chiqindilar poligonlarini boshqarish direksiyasi» davlat muassasasi hamda belgilangan talablarga javob beruvchi soliq to‘lovchilar uchun foyda solig‘i (dividendlar hisobga olingan holda) va ijtimoiy soliq 1 foiz miqdorida belgilandi.

Imtiyozlar quyidagi shartlar bilan qo‘llaniladi: • chiqindilarni yig‘ish, olib chiqish, saralash va qayta ishlashdan olingan daromadlar yil oxiridagi soliq davri bo‘yicha umumiy daromadning 90 foizidan kam bo‘lmasligi kerak; • har bir ishchining oylik maoshi kamida ikki baravar minimal ish haqi miqdorida bo‘lishi kerak.

Ushbu chora-tadbirlar barqaror rivojlanishni qo‘llab-quvvatlash, infratuzilmani modernizatsiya qilish, qayta ishlash quvvatlarini rivojlantirish va ijtimoiy hamda ekologik jihatdan ahamiyatli sohalarda faoliyat yurituvchi korxonalarni iqtisodiy jihatdan rag‘batlantirishga qaratilgan.