2025-yilda Orolbo‘yi mintaqasidagi ekologik holatni barqarorlashtirish uchun 32 million dollardan ortiq grant mablag‘lari jalb etildi
2025-12-26 10:55:00 / Yangiliklar
Joriy yilda Orolbo‘yida jami 150,7 ming gektar maydonda yashil maydonlar barpo etish bo‘yicha keng ko‘lamli ishlar olib borildi. Tadbirlarning asosiy hajmi – 145,2 ming gektari Orol dengizining qurigan tubi va unga tutash hududlarga to‘g‘ri keldi. Ishlar Mo‘ynoq tumanini qamrab oldi, u yerda 90,5 ming gektar maydonda yashil qoplamalar yaratildi, shuningdek, Buxoro, Navoiy va Xorazm viloyatlarining bir qator tumanlarida ham olib borildi. Yana 5,5 ming gektar respublikaning boshqa hududlarida ko‘kalamzorlashtirildi.
O‘rmon melioratsiyasi tadbirlariga tizimli yondashuvni ta’minlash maqsadida himoya o‘rmon o‘simliklarini yaratish bo‘yicha loyiha-smeta hujjatlari ishlab chiqildi. Ustuvor yo‘nalish sifatida sho‘rlanish va qurg‘oqchilik sharoitlariga chidamli bo‘lgan cho‘l o‘simlik turlari, jumladan saksovul, cherkas va qoraburoq tanlab olindi. Ushbu tadbirlarni amalga oshirish uchun 697 tonna urug‘ zaxirasi tayyorlandi, bu esa keng ko‘lamli ekish ishlari uchun zarur resurs bazasini ta’minladi.
Ekologik islohotlarning muhim elementi xalqaro hamkorlikni kengaytirish va tashqi moliyalashtirishni jalb qilish bo‘ldi. 2025-yilda grant mablag‘lari hisobidan yettita xalqaro loyiha ishga tushirildi, shuningdek, umumiy qiymati 32,5 million AQSH dollari bo‘lgan grantlarni jalb qilish bo‘yicha shartnomalar imzolandi. Bu loyihalar ekotizimlarni kompleks tiklash, tabiiy resurslarni integratsiyalashgan boshqarish hamda suv va yer resurslarining iqlim o‘zgarishiga chidamliligini oshirishga qaratilgan.
Amalga oshirilayotgan tashabbuslar qatoriga O‘zbekistonning qimmatli landshaftlarini integratsiyalashgan holda muhofaza qilish va tiklash, Zarafshon daryosi havzasining suv resurslarini barqaror boshqarish, Markaziy Osiyoning zaif ekotizimlarida yer resurslarini tiklash, shuningdek, ekotizimlarni muhofaza qilish va biologik xilma-xillikni saqlash mexanizmlarini takomillashtirish loyihalari kiradi. Ularning amalga oshirilishi Orol inqirozi oqibatlarini yumshatish va Orolbo‘yi mintaqasini barqaror rivojlantirishga qaratilgan uzoq muddatli yechimlarni shakllantirishga yordam beradi.