O‘zbekiston Respublikasi Ekologiya va iqlim o‘zgarishi milliy qo‘mitasi

24-dekabr holatiga ko‘ra, Davlat ekologik nazorat inspeksiyasi (Ekopolitsiya), Bosh prokuratura, Favqulodda vaziyatlar vazirligi, Milliy gvardiya va Ichki ishlar vazirligi xodimlaridan iborat Maxsus komissiya tomonidan Toshkent shahri hududida hamda Toshkent viloyatining Qibray, Zangiota, Yuqorichirchiq, Yangiyo‘l va Toshkent tumanlarida reyd tadbirlari o‘tkazildi. Olib borilgan reyd tadbirlari davomida atmosfera havosini muhofaza qilish sohasidagi qonunchilikka rioya etilishi yuzasidan 3 707 ta obekt tekshirildi.

25-noyabrdan 24-dekabrgacha bo‘lgan davrda o‘tkazilgan tekshiruvlar yakunlari bo‘yicha quyidagilar aniqlandi:

- 1 128 ta huquqbuzarlik holati aniqlanib, ular bo‘yicha ma’muriy hujjatlar rasmiylashtirildi;
- atrof-muhitga salbiy ta’sir ko‘rsatgan 110 ta obektning (shundan 99 tasi Toshkent viloyatida va 11 tasi Toshkent shahrida) faoliyati 10 ish kunigacha bo‘lgan muddatga vaqtincha to‘xtatildi;
- 94 ta issiqxona obektida chang-gaz tozalash uskunalari (filtrlar) o‘rnatildi;
- 6 ta issiqxona obekti gaz tarmoqlariga ulandi, yana 7 ta obekt gazlashtirish uchun texnik shartlar olishga ariza topshirdi.

Ma'lumot o'rnida, 23-dekabr kuni o‘tkazilgan reyd tadbirlari davomida 8 ta huquqbuzarlik holati aniqlangan.

Shuningdek, nazorat tadbirlarining ochiqligini ta’minlash, aholining ekologik madaniyatini oshirish hamda atmosfera havosini muhofaza qilishga doir qonunchilik talablarini keng jamoatchilikka yetkazish maqsadida ommaviy axborot vositalari ishtirokida maxsus videomateriallar tayyorlanib, tarqatildi.