O‘zbekiston Respublikasi Ekologiya va iqlim o‘zgarishi milliy qo‘mitasi

Joriy yilda oʻrmonlarni barpo etish va tiklash ishlari 150,7 ming gektar maydonni qamrab oldi. Oʻrmon-melioratsiya tadbirlarining asosiy hajmi Orol dengizining qurigan tubi va Orolboʻyi hududiga qaratildi, u yerda 145,2 ming gektar oʻzlashtirildi. Eng katta maydonlar Moʻynoq tumaniga toʻgʻri keladi, u yerda 90,5 ming gektarda oʻrmonzor barpo etilgan. Shuningdek, Buxoro viloyatining bir qator tumanlarida, Navoiy va Xorazm viloyatlari hududlarida ham sezilarli ishlar amalga oshirildi. Mamlakatning boshqa hududlarida yana 5,5 ming gektar oʻrmon barpo etildi.

Shu bilan birga, koʻchatxonalarni rivojlantirish va oʻrmon xoʻjaligining moddiy bazasini mustahkamlash boʻyicha tizimli ishlar olib borilmoqda. Koʻkalamzorlashtirishning barqaror surʼatlarini taʼminlash uchun 979 tonna daraxt va buta urugʻlari tayyorlandi. Mamlakatdagi barcha oʻrmon xoʻjaliklarida 1300 gektar maydonda zamonaviy koʻchatxonalar tashkil etilib, u yerda mahalliy tuproq-iqlim sharoitlariga moslashgan 123 million tup koʻchat va nihollar yetishtirilmoqda.

Yer degradatsiyasining oldini olishga alohida eʼtibor qaratilmoqda. Choʻl va togʻoldi hududlarida 1390 gektar maydonda himoya oʻrmon chiziqlari yaratildi, bu tuproq eroziyasini va shamol taʼsirini kamaytiradi. Togʻli va adir hududlarda 41 gektarda oʻrmonlar terrasalash usuli bilan barpo etildi, bu esa nishablarni samarali mustahkamlash va tabiiy landshaftlarni saqlash imkonini beradi. Qoʻshimcha yoʻnalish sifatida dorivor va oziq-ovqat oʻsimliklari plantatsiyalarini rivojlantirish belgilandi: 5890 gektar maydonda 7918 tonna mahsulot yetishtirildi.

Oʻrmon fondidan foydalanish samaradorligini oshirish doirasida avval past samarali deb topilgan 4842 gektar yerlar oʻzlashtirildi. Bundan tashqari, 1530 gektar oʻrmon fondi uchastkalari onlayn-auksionlar orqali ijaraga berildi, bu esa xususiy investitsiyalarni jalb qilishga va oʻrmon xoʻjaligi sohasida tadbirkorlikni rivojlantirishga yordam beradi.

Islohotlarning muhim qismi ilgʻor xorijiy tajribani joriy etish boʻldi. Shu maqsadda Xitoy Xalq Respublikasidan 30 ming tup brussonetiya koʻchati olib kelindi, ularning asosida 100 gektar maydonda yangi eksperimental plantatsiyalar yaratildi. Arnasoy tumanida shoʻrga chidamli oʻsimliklarning yangi galofit bogʻini yaratish ishlari boshlandi, buning uchun Xitoydan shoʻrlangan yerlar uchun istiqbolli boʻlgan 35 turdagi galofit oʻsimliklarning 1315 kilogramm urugʻi import qilindi.

Amalga oshirilgan chora-tadbirlar natijasida mamlakat hududini qoplagan oʻrmonlarning maydoni 4,7 million gektarga yetdi. Bu koʻrsatkichlar "Oʻzbekiston – 2030" Strategiyasi maqsadlarining izchil bajarilayotganini hamda ekotizimlarni tiklash, tabiiy resurslarni saqlash va atrof-muhit sifatini yaxshilash boʻyicha uzoq muddatli, ilmiy asoslangan siyosat shakllanayotganini yaqqol aks ettiradi.