Samarqandda tabiat va bioxilma-xillikni saqlashga bag‘ishlangan haykallar yaratilmoqda
2025-11-29 13:30:00 / Yangiliklar
Tadbir an’anaviy tarzda to‘rt yil davomida o‘tkazib kelinadi hamda aholining ekologik ongi va madaniyatini oshirish, ekologiya va atrof-muhitni muhofaza qilish sohasida xorijiy rassomlar bilan samarali ijodiy hamkorlikni rivojlantirish, tajriba almashish, shuningdek, tabiatga bag‘ishlangan san’at asarlari orqali shaharlarning madaniy muhitini va landshaft ko‘rinishini yaxshilashga qaratilgan.
Bu yilgi simpozium “Sayyoramiz – bizning uyimiz!” shiori ostida o‘tmoqda. Unda O‘zbekiston va Oman, Eron, Turkiya, Xitoy, Hindiston, Buyuk Britaniya, Gruziya va Yaponiya kabi mamlakatlardan 20 ga yaqin mashhur haykaltaroshlar ishtirok etmoqda. Ular tabiat va san’atga bag‘ishlangan marmar asarlar yaratmoqdalar.
“Simpoziumda ishtirok etish uchun 73 davlatdan 150 dan ortiq haykaltarosh tomonidan 300 dan ziyod eskiz loyihalari taqdim etildi, — dedi O‘zbekiston Rassomlar uyushmasi raisi Ibrohim Valixo‘jayev. — Hay’at 17 ishni tanlab oldi va ularning mualliflari mamlakatimizga taklif qilindi. Hozir shu eskizlar asosida haykallar yaratilmoqda. Haykaltaroshlarga kerakli miqdorda marmar taqdim etilgan, ular o‘ziga xos san’at asarlarini yaratish ustida ishlamoqda”.
Samarqanddagi “Jannat makon” bog‘ida simpoziumni yuqori darajada tashkil etish, mahalliy va xorijiy haykaltaroshlar samarali ishlashi va tajriba almashishi uchun barcha sharoitlar yaratilgan. Simpozium davomida yaratiladigan monumental asarlar Samarqand va Toshkent shaharlaridagi bog‘ va xiyobonlarga o‘rnatiladi.
7-dekabrgacha davom etadigan tadbir doirasida “Ipak yo‘li” turizm va madaniy meros xalqaro universiteti hamda Samarqand Turizm akademiyasida haykaltaroshlar ishtirokida uchrashuvlar va mahorat darslari bo‘lib o‘tadi. Shuningdek, CITES CoP20 ishtirokchilarining simpozium jarayoni va yaratilayotgan haykallar bilan yaqindan tanishishi ham rejalashtirilgan.
Bundan tashqari, Samarqand xalqaro turizm markazida CITES CoP20 doirasida yovvoyi fauna va flora turlarining yo‘qolib borayotgan vakillariga bag‘ishlangan tasviriy san’at asarlari ko‘rgazmasi ham o‘tkazilmoqda.