Ekologik talablarni buzgan g‘isht zavodi faoliyati to‘liq to‘xtatildi
2025-11-28 16:00:00 / Yangiliklar
Ekologiya va iqlim o‘zgarishi milliy qo‘mitasi, Bosh prokuratura, Toshkent viloyati prokuraturasi va ichki ishlar organlari hamkorligida o‘tkazilgan navbatdagi tungi reyd davomida yana bir jiddiy ekologik qonunbuzilish holati fosh etildi.
Xususan, Yangiyo‘l tumani “Saxovat” mahallasida faoliyat yuritayotgan g‘isht zavodi chang-gaz tozalash uskunalarisisiz va hatto mo‘r quvurisiz ishlab kelayotgani aniqlandi. Yoqilg‘i sifatida kesilgan daraxtlar va avtomobil shinalaridan foydalanilgani, shuningdek, korxona hududiga noqonuniy chiqindilar joylashtirilgani ma’lum bo‘ldi.
Atmosferaga jiddiy zarar yetkazayotgan ushbu holatga darhol chek qo‘yildi: korxona faoliyati va atmosferaga ajratilayotgan zararli tashlamalar manbalari to‘liq to‘xtatildi.
Hozirda tabiatga yetkazilgan zarar miqdori hisoblanmoqda. Tekshiruv natijalariga ko‘ra amaldagi qonunchilikka muvofiq qat’iy chora-tadbirlar qo‘llaniladi.
Nazorat tadbirlari izchil davom ettiriladi.