Hozirda Ekologiya qo‘mitasida tunu-kun ishlaydigan tezkor shtab tashkil etildi. Shtab tomonidan uch kun, 24 soat davomida turli tashkilotlar: qurilish sektori, energetika sohasi, ekologiya va obodonlashtirish tizimi, ilmiy-tadqiqot institutlarining olim va mutaxassislari ishtirokida Toshkent havosini yaxshilash bo‘yicha aniq chora-tadbirlar rejasi tayyorlanmoqda. Hududimizning iqlimi, mavjud resurslardan kelib chiqib turli yondashuvlar ishlab chiqilmoqda. 

Gidrometeorologiya ilmiy-tadqiqot instituti xodimi, iqlimshunos Erkin Abdulahatovga ko’ra, Toshkent so‘nggi yillarda qurg‘oqchil hududga aylanmoqda.  Gidrometeorologiya xizmati agentligi ma’lumotlariga ko‘ra, Toshkent observatoriyasi 1868-yildan buyon kuzatuvlar olib boradi va hozirgi qurg‘oqchilik 170 yil ichidagi eng quruq davrlardan biri — 1917-yildan keyingi eng qurg‘oqchil yil hisoblanmoqda. Albatta, bunday qurg‘oqchilik changning ko‘payishiga sabab bo‘lmoqda.

Bugungi kunda Toshkent shahri havosini yaxshilash maqsadida ertalab va kunning o‘rtalarida ko‘chalarda suv sepish ishlari olib borilmoqda. Yirik sanoat korxonalariga ogohlantirish xatlari yuborilib, filtrlar o‘rnatish bo‘yicha choralar ko‘rilmoqda, hatto ayrim korxonalar faoliyatini vaqtincha to‘xtatish masalasi ham kun tartibida. Ekologiya inspeksiyasi, ekologik politsiya va boshqa vakolatli organlar qurilish maydonlarida qattiq nazorat o‘rnatgan.

Issiqxonalar masalasida ham tunu-kun reydlar davom etmoqda. Qish oylarida issiqxonalarning yoqilishi havo ifloslanishiga ta’sir qilayotgani sabab, ularga gaz resurslarini ajratish masalalari qayta ko‘rib chiqilmoqda.

Qolaversa, shahar bo‘ylab yangi suv obyektlari, sun’iy suv purkagichlar o‘rnatish imkoniyatlari o‘rganilmoqda. Chunki havodagi changni eng yaxshi ushlab qoladigan vosita — suv. Eski favvoralarni qayta ishga tushirish, yangi favvoralar qurish bo‘yicha ham qaror loyihalari ishlab chiqilmoqda.

Bundan tashqari, yashil hududlarni kengaytirish masalasiga alohida urg‘u berilmoqda. Daraxt kesishga qarshi cheklovlar kuchaytirildi. Bu nafaqat changni kamaytirish, balki yozgi jaziramani yumshatish uchun ham muhimdir.

"Gidromet" mutaxassislarining prognozlariga ko‘ra, dekabr oyining ikkinchi yarmidan boshlab, keyin yanvar va fevralning ayrim kunlarida yomg‘ir yog‘ishi kutilmoqda. Kuchli yomg‘irlar havo sifatini tabiiy ravishda yaxshilaydi.

Xulosa qilib aytganda, ekologik vaziyat bo‘yicha jiddiy va dadil qadamlar boshlandi. Bu ishlarni nafaqat davlat, balki jamoatchilik ham qo‘llab-quvvatlashi lozim.