O‘zbekiston 2035-yilga qadar issiqxona gazlari tashlamalarini 50 foizgacha kamaytiradi
2025-11-18 10:00:00 / Yangiliklar
Vazir o‘z nutqida Markaziy Osiyoning iqlim o‘zgarishiga nisbatan yuqori darajadagi zaifligini, yerlarning degradatsiyasi kuchayib borayotganini va suv resurslarining qisqarayotganini ta’kidladi. Shuningdek, mintaqada harorat allaqachon 2,2 °C ga ko‘tarilgani, muzliklar esa har yili hajmining 0,5 foizigacha yo‘qotayotganini aytib o‘tdi.
Shuningdek, Aziz Abduhakimov O‘zbekiston Respublikasining Milliy miqyosda belgilangan hissalar (MMBH) borasidagi yangi maqsadiga e'tibor qaratdi — mamlakat 2010-yilga nisbatan 2035-yilga borib YAIM birligiga to‘g‘ri keladigan issiqxona gazlari tashlamalarini 50 foizga kamaytirishni maqsad qilgan.
Bundan tashqari, vazir qayta tiklanuvchi energetikani rivojlantirish, o‘rmonzorlarni kengaytirish, chiqindilar bilan ishlash tizimini modernizatsiya qilish rejalari haqida gapirdi. “Green University” tashabbusi va cho‘llanishga qarshi kurash bo‘yicha tashkil etilayotgan mintaqaviy markazning ahamiyatini ham alohida qayd etdi.
Yakunda Aziz Abduhakimov ishtirokchilarni 2026-yil 31-may – 5-iyun kunlari Samarqandda o‘tkaziladigan GEFning 8-Assambleyasi va "Eco Expo Central Asia" ko‘rgazmasiga taklif qildi.