O‘zbekiston Respublikasi Ekologiya va iqlim o‘zgarishi milliy qo‘mitasi

Tomonlar ikki tomonlama hamkorlikni kengaytirish istiqbollarini muhokama qilishdi va 2026–2030-yillarda atrof-muhitni muhofaza qilish va o‘rmon xo‘jaligi bo‘yicha hamkorlikka doir “Yo‘l xaritasi”ni imzolashga tayyorgarlik masalasida kelishib olishdi. Hujjat o‘rmon qonunchiligi bo‘yicha tajriba almashish, yong‘oq, pista va zaytun kabi daraxtli ekinlarni ko‘paytirish, xalqaro tabiatni muhofaza qilish konvensiyalarini amalga oshirish, qo‘shma ilmiy-amaliy konferensiyalar va seminarlar o‘tkazish, o‘rmon yong‘inlarining oldini olish va zararkunandalarga qarshi kurashish sohalarida hamkorlik kabi yo‘nalishlarni qamrab oladi. Yo‘l xaritasi doirasida xalqaro donorlar uchun qo‘shma loyihaviy takliflar tayyorlash, iqlim o‘zgarishining ta’sirini o‘rganish, ayniqsa, Orolbo‘yi hududida, shifobaxsh o‘simliklarni saqlash bo‘yicha tajriba almashish, ov xo‘jaligi, ekologik madaniyat va turizm yo‘nalishlarini rivojlantirish ham rejalashtirilmoqda. Alohida band sifatida "Green University" uchun turkman talabalariga grant o‘rinlari ajratish, shuningdek, ularni O‘zbekiston OTMlarida ekologik yo‘nalishlarda tayyorlash nazarda tutilgan.

Uchrashuvda kovrakning yovvoyi turlarini saqlash bo‘yicha hamkorlik salohiyatiga alohida e’tibor qaratildi. Turkmaniston tomonidan tiklash va ilmiy tadqiqot maqsadlari uchun urug‘ yoki ko‘chat materiallari yetkazib berish imkoniyati ko‘rib chiqilmoqda. O‘zbekistonning milliy dasturlarini inobatga olgan holda, Surxondaryoda kovrak yetishtirish bo‘yicha qo‘shma pilot loyihani amalga oshirish taklif etildi. Shuningdek, tomonlar cho‘llanishga qarshi kurashish, cho‘lga bardoshli ekinlar maydonlarini kengaytirish, umumiy ko‘chatxona yaratish va “cho‘l agro‘rmonchiligi” yo‘nalishini rivojlantirish borasida qo‘shma tadqiqotlarni kuchaytirishga tayyor ekanliklarini bildirdi.

Uchrashuvda tomonlar Samarqand deklaratsiyasi va 2026–2032-yillarda hayvonot va o‘simlik dunyosi resurslaridan barqaror foydalanish bo‘yicha mintaqaviy hamkorlik rejasi loyihasi yuzasidan ham fikr almashdilar. Mazkur CITES CoP20 doirasida aynan Samarqand deklaratsiyasi imzolanishi rejalashtirilgani ta’kidlandi.

Tomonlar tabiatni muhofaza qilish sohasida muvofiqlashtirilgan mintaqaviy kun tartibining ahamiyatini qayd etib, o‘rmon resurslarini barqaror boshqarish, ekotizimlarni tiklash va mintaqaning tabiiy salohiyatini oshirishga qaratilgan sheriklikni mustahkamlash maqsadida hamkorlikni davom ettirishga tayyorliklarini bildirishdi. Qolaversa, kelishilgan barcha yo‘nalishlar bo‘yicha doimiy muloqot va amaliy hamkorlikni faollashtirib borishga kelishib oldilar.