“Sharite” universitet klinikasi delegatsiyasining mamlakatimizga tashrifi
2025-06-10 12:05:00 / Yangiliklar va voqealar
Joriy yilning 10-iyun kuni tashqi ishlar vaziri o‘rinbosari Olimjon Abdullayev Germaniyaning yetakchi tibbiyot muassasasi — Berlin shahridagi “Sharite” universitet klinikasi direktori o‘rinbosari doktor Yoaxim Zeybold boshchiligidagi delegatsiyani qabul qildi.
Uchrashuv avvalida O‘zbekiston va Germaniya o‘rtasida tibbiyot sohasidagi hamkorlikni mustahkamlash, xususan, O‘zbekistonlik tibbiyot xodimlarini, ayniqsa malakali hamshiralarni Germaniyaga ishga joylashtirish imkoniyatlari, taʼlim va ilmiy almashinuv yo‘nalishlarini rivojlantirish masalalari muhokama qilindi.
“Sharite” universitet klinikasi 1710-yilda tashkil etilgan bo‘lib, Germaniya va Yevropa miqyosida eng nufuzli tibbiyot muassasalaridan biri hisoblanadi. U 4 ta kampus, 100 dan ortiq klinik va ilmiy bo‘limlarni qamrab olgan. 18 700 nafar xodim, shu jumladan 5 000 nafar shifokor va tadqiqotchi faoliyat yuritadi. Yiliga 800 000 nafar bemorga xizmat ko‘rsatiladi. Newsweek reytingiga ko‘ra Yevropa bo‘yicha eng yaxshi 10 klinika qatoriga kiradi, Focus Gesundheit nashriga ko‘ra esa Germaniyada 1-o‘rinni egallab kelmoqda. Shu bilan birga, 60 dan ortiq mamlakat bilan hamkorlik qilmoqda va xorijiy tibbiyot mutaxassislarini jalb qilish bo‘yicha katta tajribaga ega.