Xitoy Xalq Respublikasining O‘zbekistondagi elchisi bilan uchrashuv to‘g‘risida
2025-12-30 17:00:00 / Yangiliklar va voqealar
2025-yil 30-dekabr kuni O‘zbekiston Respublikasi tashqi ishlar vaziri o‘rinbosari Bobur Usmanov Xitoy Xalq Respublikasining O‘zbekistondagi elchisi Yuy Szyun bilan uchrashuv o‘tkazdi.
Uchrashuv davomida 2025-yil yakunlari sarhisob qilindi va 2026-yilga mo‘ljallangan har tomonlama strategik sheriklikning ustuvor yo‘nalishlari belgilab olindi.
Ikki tomonlama hamkorlikning izchil va barqaror rivojlanishi, Oliy va yuqori darajalarda muntazam va mazmunli aloqalarning izchil davom ettirilishi va mintaqalararo sheriklikning sezilarli darajada faollashishi mamnuniyat bilan qayd etildi.
Siyosiy muloqot, savdo-iqtisodiy, investitsiya va madaniy-gumanitar hamkorlik kabi keng ko‘lamli sohalarda o‘zaro aloqalarning kengayishi, har tomonlama strategik sheriklikni yanada mustahkamlashga va qo‘shma tashabbuslarni amalga oshirishga hissa qo‘shishi ta‘kidlandi. Ikki tomonlama munosabatlarni rivojlantirish izchil ravishda do‘stlik va o‘zaro ishonch, teng huquqli va o‘zaro foydali hamkorlik, ikki tomonning asosiy manfaatlarini o‘zaro qo‘llab-quvvatlash, barqaror taraqqiyot va farovonlikka umumiy sadoqat tamoyillariga asoslanganligi ta’kidlandi.
Xitoy tomoni Oʻzbekistonning tanlagan mustaqil milliy rivojlanish yoʻlini qatʼiy qoʻllab-quvvatlashini yana bir bor tasdiqladi va “Yangi Oʻzbekiston” strategiyasi doirasida amalga oshirilayotgan ustuvor ijtimoiy-iqtisodiy islohot dasturlarini ilgari surishda har tomonlama yordam koʻrsatishga tayyorligini bildirdi.
Oʻz navbatida, Oʻzbekiston tomoni “Yagona Xitoy” siyosatini, shuningdek, Xitoy Xalq Respublikasining hududiy yaxlitligi va davlat suverenitetini izchil va prinsipial qoʻllab-quvvatlashini tasdiqladi.
Tomonlar ikki tomonlama kun tartibidagi dolzarb masalalarni muhokama qilish uchun ishchi aloqalarni davom ettirishga tayyor ekanliklarini bildirdilar.