Vazirlik tarmoqlararo o‘zaro bog‘liqlik va muvozanatni inobatga olgan holda mamlakatni o‘rta va uzoq muddatlarda ijtimoiy-iqtisodiy rivojlantirishning ustuvor yo‘nalishlarini ishlab chiqish, budjet, soliq va bojxona sohalarida, fuqarolarning pensiya ta’minoti, buxgalteriya hisobi va moliyaviy hisobot sohasida, auditorlik faoliyatini tartibga solish, budjet tashkilotlari va budjet mablag‘lari oluvchilarni moliyalashtirish, monopolist korxonalarning tovar va xizmatlari uchun narx belgilash, davlat xaridlarini amalga oshirishni tartibga solish, O‘zbekiston Respublikasi Davlat budjetining strategik makroiqtisodiy ko‘rsatkichlari va parametrlariga erishishni ta’minlash funksiyalarini amalga oshiruvchi vakolatli respublika ijro etuvchi hokimiyat organi hisoblanadi.

Vazirlik O‘zbekiston Respublikasi Vazirlar Mahkamasiga bo‘ysunadi.

Vazirlik o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining hujjatlariga, boshqa qonunchilik hujjatlariga shuningdek, Nizomga amal qiladi.

Vazirlik tomonidan o‘z vakolatlari doirasida qabul qilingan va normativ-huquqiy xususiyatga ega bo‘lgan qarorlari davlat va xo‘jalik boshqaruvi organlari, mahalliy davlat hokimiyati organlari, boshqa tashkilotlar va ularning mansabdor shaxslari, shuningdek, yuridik va jismoniy shaxslarning ijro etishi uchun majburiy hisoblanadi.

Vazirlik yuridik shaxs hisoblanadi. O‘zbekiston Respublikasi Davlat gerbi tasviri tushirilgan hamda o‘z nomi davlat tilida yozilgan muhrga va blankalarga, shaxsiy g‘azna hisobvaraqlariga, bank hisobraqamlariga, shu jumladan, chet el valyutasidagi hisobraqamlariga ega.

Vazirlik o‘z faoliyatini qonunchilik hujjatlariga muvofiq, respublika ijro etuvchi hokimiyat organlari, mahalliy davlat hokimiyati organlaridan mustaqil ravishda amalga oshiradi.

Vazirlikning rasmiy nomi:

a) davlat tilida:

to‘liq nomi — O‘zbekiston Respublikasi Iqtisodiyot va moliya vazirligi,

qisqartmasi — Iqtisodiyot va moliya vazirligi;

b) rus tilida:

to‘liq nomi — Министерство экономики и финансов Республики Узбекистан,

qisqartmasi — Минэкономфин;

d) ingliz tilida:

to‘liq nomi — Ministry of Economy and Finance of the Republic of Uzbekistan,

qisqartmasi — MEF.

Vazirlikning joylashgan joyi: Toshkent shahri, Istiqlol ko‘chasi 29-uy, 100017.

 

Vazirlik tashkiliy tuzilmasiga (tizimiga) quyidagilar kiradi:

 

• Vazirlikning markaziy apparati;

• Qoraqalpog‘iston Respublikasi Iqtisodiyot va moliya vazirligi, viloyatlar va Toshkent shahar iqtisodiyot va moliya bosh boshqarmalari;

• Tuman va shaharlar iqtisodiyot va moliya bo‘limlari;

a) Vazirlik huzuridagi ijro etuvchi hokimiyat organlari:

• Bojxona qo‘mitasi;

• G‘aznachilik xizmati qo‘mitasi;

• Davlat zaxiralarini boshqarish qo‘mitasi;

• Kadastr agentligi;

• Davlat asillik darajasi nazorati inspeksiyasi.

b) Vazirlik tasarrufidagi tashkilotlar:

• Budjetdan tashqari pensiya jamg‘armasi;

• “Axborot texnologiyalari markazi” DUK;

• Budjet-soliq ilmiy tadqiqotlari instituti;

• Moliya organlari hamda budjet tashkilotlari moliya-hisob bo‘linmalari xodimlarini tayyorlash va qayta tayyorlash o'quv markazi;

• Tarmoq bozorlari va ishlab chiqarishda mehnat unumdorligi tadqiqotlari markazi;

• Qishloq xojaligini davlat tomonidan qo‘llab-quvvatlash jamg‘armasini boshqarish departamenti;

• Sanoat korxonalarining energiya samaradorligini oshirish loyihasi;

• “Yashil iqtisodiyot loyihalari markazi” loyiha ofisi;

• “Qishloq infratuzilmasini rivojlantirish va qishloq joylarni barqaror rivojlantirish birlashtirilgan loyihalarni amalga oshirish guruhi” DM;

• “Infratuzilma loyihalarini amalga oshirish direksiyasi” DM;

• Sanoat siyosatini amalga oshirish va sanoatning bazaviy tarmoqlarini rivojlantirish yo‘nalishlarini ishlab chiqish loyiha ofisi;

• O‘zbekistonda davlat-xususiy sheriklik loyihalarini ishlab chiqish jamg‘armasi;

• Ma’muriy binolardan foydalanish boshqarmasi;

• “Instutsional salohiyatni oshirish” loyihasini amalga oshirish guruhi;

• “O‘rta shaharlarni kompleks rivojlantirish” loyihasi;

• UzAssets Investitsiya Kompaniyasi” AJ;

• “Tadbirkorlikni rivojlantirish kompaniyasi” AJ;

• “Loyihalar va import kontraktlarini kompleks ekspertiza qilish markazi” DUK O‘zbekiston Respublikasi Iqtisodiyot va moliya vaziriga bo‘ysunadi.