Butunjahon qushlarni kuzatish kunlari
2025-10-03 11:30:00 / Yangiliklar
Bu tadbir "BirdLife International" tashkiloti tashabbusi bilan yo‘lga qo‘yilgan. Dastlab 1993-yilda "World Birdwatch" nomi bilan boshlangan va hozirda butun dunyoda yuz minglab odamlar ishtirok etadi. Odatda, dunyoda oktyabr oyining birinchi haftasi oxirlarida o‘tkaziladi.
O‘zbekistonda ham har yili Ekologiya, atrof-muhitni muhofaza qilish va iqlim o‘zgarishi vazirligi tomonidan hamkor tashkilotlar bilan birga qushlarni muhofaza qilishga doir turli aksiyalar o‘tkazib kelinadi. Xususan, "Qishda qushlarga ko‘mak" aksiyasi, “Qushlar bizning do‘stimiz” eko-aksiyasi, Xalqaro qushlarni oziqlantirish kuni va boshqa tadbirlar shular jumlasidandir.
Bugungi kunda respublikada jami 487 turdagi qushlar mavjud bo‘lib, bulardan 52 turdagisi Qizil kitobga kiritilgan, yaʼni noyob qushlar hisoblanadi. Qushlarning 86 turi oʻtroq, 122 turi uyalovchi, uchib oʻtuvchi, 63 turi faqat uchib oʻtuvchi, 80 turi uchib oʻtuvchi, qishlovchi, 16 turi qishlovchi, 54 turi uyalovchi, uchib oʻtuvchi va qishlovchi, 55 turi tasodifan uchib keluvchi (kamdan-kam holda uchrovchi) qushlar hisoblanadi. Qushlarning 320 turi migratsiyada ishtirok etadi.
Asosiy maqsad — qushlarni kuzatish orqali ularning turlarini o‘rganish, yashash muhitini muhofaza qilish zarurligiga e’tibor qaratish va jamoatchilikni ekologik muammolarga jalb etishdir. Qushlar bioxilma-xillikni asrashda muhim ahamiyatga ega bo‘lib, ularning soni va xilma-xilligi ekologik barqarorlikni ta'minlaydi. Shu sababli ularni kuzatish va himoya qilish global ekologik monitoring uchun juda muhim hisoblanadi.