Tabiatni asrashda yoshlarning ishtirokini oshirish borasida keng ko‘lamli ishlar olib borilmoqda
2025-10-02 17:00:00 / Yangiliklar
Uchrashuvda Ekologiya vazirligi bo‘lim boshlig‘i Zarrina Abdullayeva yoshlarning tabiatni asrash va ekologik muammolarning oldini olishga bag‘ishlangan targ‘ibot tadbirlari, seminarlar, turli aksiyalar hamda xalqaro forumlarda faol ishtirok etishi muhim ekanligini ta'kidladi.
O‘z navbatida 2025-yilda “Tabiat inʼomlari” va “Eng yaxshi ekologik toza maktab” videoroliklar tanlovlari, “Ona tabiatni asrash barchamizning muqaddas burchimiz”, “Yashil makon” mavzusidagi rasmlar tanlovi kabi ko‘plab tadbirlar rejalashtirilganligi qayd etildi.
Uchrashuv davomida ekologik targ‘ibot tadbirlarida faol bo‘lib kelayotgan yoshlarga O‘zbekiston Respublikasi Qizil kitoblari taqdim etildi.
Ma'lumot uchun, so‘nggi yillarda ekologiya va atrof-muhitni muhofaza qilish, tabiatni asrash, tabiiy resurslardan oqilona foydalanishda yoshlarning ishtirokini oshirish, ular o‘rtasida ekotarg‘ibotni kuchaytirish hamda yoshlarni bir g‘oya ostida birlashtirish maqsadida qator ishlar amalga oshirilmoqda. Xususan, 2025-yil yanvar-sentabr oylarida respublikamizda volontyorlar, ekofaollar hamda aholi ishtirokida 35 dan ortiq tadbirlar tashkil etildi va unda jami 2,1 mln nafar ishtirokchi qatnashdi.