Bu Vazirlar Mahkamasining 2024-yil  26-martdagi 156-sonli Qarori bilan tasdiqlangan “Jamoatchilik fikri asosida ishlab chiqilgan “Mening bogʻim” loyihalarini shakllantirish va moliyalashtirish tartibi toʻgʻrisidagi nizomni tasdiqlash haqida”gi qarorida alohida belgilab qoʻyildi. 

Qarorga ko‘ra, har yili dekabr oyida Respublikamizning barcha hududlarida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan “yashil bogʻ” hamda “yashil jamoat parklari”ni tashkil etish uchun belgilangan tartibda yer maydonlari ajratiladi. 

Shuningdek, har yili “Ochiq byudjet” axborot portali orqali ajratiladigan byudjet mablagʻlarning kamida 50 foizi “yashil bogʻ” va “yashil jamoat parklari”ni tashkil qilish uchun jamoatchilik fikri asosida ishlab chiqilgan “Mening bogʻim” loyihalarini moliyalashtirishga yoʻnaltiriladi.

“Mening bogʻim” loyihalarini shakllantirish va ularga ovoz berish jarayoni har yili yanvar-fevral oylarida 8-bosqichda amalga oshiriladi. Eng koʻp ovoz toʻplagan loyihalar gʻolib deb topiladi va bu loyihalar asosida belgilangan tartibda “yashil bogʻ” va “yashil jamoat parklari” barpo qilinadi. “Mening bogʻim” loyihalari uchun mablagʻlar Qoraqalpog‘iston Respublikasi Ekologiya, atrof-muhitni muhofaza qilish va iqlim o‘zgarishi vazirligi, Ekologiya vazirligining viloyatlar va Toshkent shahar boshqarmalariga o‘tkazib beriladi. Bunda mablag‘lar tuman va shaharlarga teng ulushlarda, lekin 250 mln soʻmdan kam boʻlmagan miqdorda taqsimlanadi.
 
“Ochiq byudjet portali” orqali respublika byudjeti mablagʻlari hisobidan qiymati 250 mln soʻmdan oshmagan tashabbuslar asosida Respublika boʻyicha 310 ta “yashil bogʻ” va 160 ta “jamoat parklari” tashkil etiladi.

Ma'lumot uchun, yurtimizda "Yashil makon" umummilliy loyihasi doirasida salmoqli ishlar amalga oshirilmoqda. Jumladan, so‘nggi uch yil davomida jami 500 mln tupga yaqin daraxt va buta ko‘chatlari ekildi, 935 gektar "yashil bog‘"lar va 893,5 gektar "yashil jamoat parklari" tashkil etildi.