O‘zbekiston Respublikasi Ekologiya va iqlim o‘zgarishi milliy qo‘mitasi

Hashar Vazirlar Mahkamasining 2025-yil 13-avgustdagi farmoyishiga ko‘ra "Yashil makon" umummilliy loyihasi doirasida obodonlashtirish ishlarini amalga oshirish, sog‘lom turmush tarzi hamda sanitariya-gigiyenaga amal qilish, muhtoj qatlamlarni qo‘llab-quvvatlash maqsadida tashkil etildi. 

Hasharda Ekologiya, atrof-muhitni muhofaza qilish va iqlim o‘zgarishi vazirligi xodimlari ham faol ishtirok etdi. Xususan, Toshkent shahri, Yakkasaroy tumani "Yunus Rajabiy" mahalla fuqarolar yig‘inidagi o‘zlariga biriktirilgan hududni chiqindilardan tozalashdi. 

Ikki kun davomida yurtimizdagi barcha mahallalar, ko‘chalar, xiyobonlar, ziyoratgohlar, bolalar maydonchalari va boshqa hududlar chiqindilardan xalos qilindi. Shuningdek, daraxtlar oqlandi, gullar va boshqa turdagi o‘simliklar parvarish qilindi.

Bundan tashqari, umumxalq xayriya hashari davomida yana bir ezgu amalga sodiq qolindi — nuroniylar, yolg‘iz keksalar, ijtimoiy himoyaga muhtoj insonlar, nogironligi bor shaxslarning holidan xabar olinib, ularga har tomonlama ko‘mak berildi.

Umumxalq xayriya hashari yurtimizni ozoda saqlash, insoniylik tuyg‘ularini yuksaltirish, insonlarda ekologik mas'uliyat va tabiatga daxldorlik hissini oshirishga xizmat qiladigan savobli an'anaga aylanib bormoqda. Biz yurtdoshlarimizni nafaqat umumxalq hasharida, balki har kuni, har lahza tabiatga g‘amxo‘r bo‘lishga, atrof-muhitni toza saqlashga chorlab qolamiz.